Тошкент шаҳар божхона бошқармасининг «Бошпочтампт» ташқи иқтисодий фаолият божхона пости ходимлари томонидан почта жўнатмалари орқали гиёҳвандлик воситаларини жўнатилишининг олди олинди. Бу ҳақда «Дарё»га бошқарма ахборот хизмати хабар берди.
Таъкидлаш жоизки, сўнгги пайтларда почта жўнатмалари орқали республикага хорижий давлатлардан марихуна ўсимлиги, яъни нашанинг уруғларини юбориш ҳолатлари сурункали тус олган.
Жумладан, Россиядан почта жўнатмалари орқали Тошкент шаҳрида истиқомат қилувчи фуқаро Файзуллаев номига 10 дона, Тошкент вилояти, Нурафшон шаҳрида истиқомат қилувчи фуқаро Раҳматуллаев номига 2 дона, Андижон шаҳрида истиқомат қилувчи фуқаро Ўринбоев номига 5 дона марихуана уруғлари юборилган.
Шунингдек, Украинадан пойтахтда истиқомат қилувчи Лесничий номига 5 дона ҳамда Исхоқов номига 8 дона наша уруғлари юборилган.
Худди шундай ҳолат Беларусдан юборилган почта жўнатмалари орасида ҳам қайд этилди. Хусусан, ушбу давлатдан Тошкент шаҳрида истиқомат қилувчи Нигматов номига келган почта жўнатмаси орқали 8 дона марихуана уруғлари юборилган.
Тошкент шаҳар божхона бошқармасининг божхона текширувлари ва суриштирув бўлими томонидан мазкур ҳолатлар юзасидан тегишли текширув ҳаракатлари олиб борилиб, иш материаллари юритилди ҳамда қонуний ҳал қилиш учун тегишли суд идорасига юборилди.
Суд қарорларига асосан божхона органлари томонидан вақтинча олиб қўйилган марихуана ўсимлиги уруғлари эндиликда тегишли тарзда йўқ қилинади.
Изоҳ (0)