Бугун Тошкент шаҳридаги Симпозиумлар саройида 26—27 март кунлари бўлиб ўтадиган, Афғонистоннинг энг долзарб муаммоларига бағишланган «Тинчлик жараёни, хавфсизлик соҳасидаги ҳамкорлик ва минтақавий шериклик» мавзусидаги халқаро конференция матбуот маркази расман иш бошлади.
Матбуот марказида маҳаллий ва хорижий журналистлар учун самарали фаолияти учун барча шароитлар яратилган. Хусусан, марказ замонавий коммуникация воситалари, офис жиҳозлари, Wi-Fi билан таъминланган. ОАВ ходимларининг дунёнинг турли мамлакатларидан келганини ҳисобга олган ҳолда матбуот маркази узлуксиз тун-у кун фаолият юритади.
Халқаро конференцияни ёритиш учун 300 га яқин ОАВ вакиллари аккредитациядан ўтди. Улар орасида АҚШнинг Nyu-York Times газетаси, Хитойнинг «Жэньминь жибао» ахборот агентлиги, Буюк Британиянинг BBC компанияси, Япониянинг NHK корпорацияси, Россиянинг «Независимая газета» каби нуфузли ОАВ ходимлари ҳам бор.
«Афғонистон ҳақида узоқ йиллар мобайнида маълумот кам бўлганини ва ОАВ ходимларининг қизиқишини инобатга олган ҳолда, конференция давомида ва ундан олдин айнан матбуот марказида юқори даражадаги мулозимлардан ташқари, турли давлат ташкилотлари вакиллари, шарқшунос олимлар ва тарихчилар иштирокида бир нечта сессиялар ўтказилади. Бу мулоқотлар орқали сиз Афғонистон ҳақида янги маълумотлардан бохабар бўласиз», — дейди марказ матбуот котиби Шерзод Қудратхўжаев.
Изоҳ (0)