Тожикистон ва Ўзбекистон ўртасида автобус қатнови апрель ойида тикланади. Бу ҳақда Asian Express Terminal транспорт компанияси раҳбари Султон Камолов 22 март куни маълум қилди, деб хабар берди «Telegraf.uz».
Унинг сўзларига қараганда, автобуслар Душанбедан Денов ва Термизга, Панжикентдан Самарқандга ва Хўжанддан Тошкент ҳамда Фарғонага қатнайди. Бироқ ҳозирча тожик ва ўзбек транспортчилари шаҳарлараро автобусларнинг йўлкира нархи борасида келишиб олмаган.
«Биз йўл кира нархлари бўйича келишиб олишимиз керак, чунки бу йўналишларда ўзбек компанияси ҳам йўловчиларга хизмат кўрсатади. Яқин ораларда компаниямиз делегацияси Тошкентга ташриф буюради, биз ўзбек ҳамкасбларимиз билан шаҳарлараро автобусларнинг йўлкира нархи юзасидан якуний келишувга эришишимизга умид қиламан», — дейди Султон Камолов.
Султон Камолов, шунингдек, Asian Express Terminal компанияси Тошкент билан «Ўзавтосаноат» томонидан ишлаб чиқарилган 200 та автобус сотиб олиш борасида шартнома имзолаганини ҳам таъкидлаб ўтди. «Тез орада автобуслар колоннаси Душанбега келади», — дея таъкидлади Asian Express Terminal раҳбари.
Ўзбекистон ва Тожикистон ўртасидаги автобус қатнови ҳамда мунтазам самолёт парвози 1992 йилда, Тожикистонда фуқоролар уруши бошланганида тўхтаб қолган. 25 йиллик танаффусдан сўнг, ўтган йилнинг апрель ойидан бошлаб Душанбе ва Тошкент ўртасида ҳаво қатнови тикланганди.
Изоҳ (0)