Ўзбекистонда «Поедем, поедим!» кўрсатуви тасвирга олинмоқда

Россиянинг «НТВ» телеканали орқали узатиладиган «Поедем, поедим!» («Борамиз, тановул қиламиз!») оммабоп шоусининг яна бир сони Ўзбекистон бўйлаб саёҳатга бағишланади, дея хабар бермоқда Туризмни ривожлантириш давлат қўмитаси миллий PR-маркази.

Кўрсатувни суратга олиш гуруҳи PR-марказ таклифига биноан 19 мартдан 26 мартга қадар Тошкентда ва мамлакатнинг жанубий ҳудудларида бўлади.

Бу сафар россиялик журналистлар Ўзбекистон Миллий телерадиокомпаниясининг «Дунё бўйлаб» телеканали ижодий гуруҳи билан биргаликда ишлайди. Шу йилнинг февралидан бошлаб Туризмни ривожлантириш давлат қўмитасининг бош ахборот ҳомийсига айланган «Дунё бўйлаб» телеканали меҳмонларга техник ва ижодий кўмак беради, шунингдек, сафар чоғида маҳаллий эфир учун ҳам ўз кўрсатувларини тайёрлайди.

Кўрсатувнинг Ўзбекистонга бағишланган биринчи сони Самарқандда, кейингилари Бухоро, Тошкент ва Хоразм воҳаларида суратга олинганди.