Дубай «ақлли» автомобиль рақамларига эга дунёдаги биринчи шаҳар бўлади

Дубай йўллар ва транспорт бўйича бошқармаси (RTA) «ақлли» автомобиль рақамларини синовдан ўтказа бошлади, деб хабар беради «Русские Эмирати».

Мазкур тизим автомобиль рақамлари тахтачасини алмаштирмаган ҳолда ундаги рақамлар, дизайн ва бошқа маълумотларни ўзгартириш имконини беради.

Қайд этилишича, Дубай ушбу тизим жорий этилган дунёдаги илк шаҳар бўлади. Лойиҳа Американинг Ревивер Ауто фирмасининг Яқин Шарқдаги ягона вакили Теам Target International билан ҳамкорликда амалга оширилмоқда.

Ушбу қадам йўллар ва транспорт бўйича бошқармасининг Дубайни дунёдаги энг ақлли шаҳарга айлантириш йўлидаги ташаббусларидан бири ҳисобланади.

Қайд этилишича, «ақлли» автомобиль рақамларининг жорий этилиши Дубай йўл ҳаракати концепцияси ва технологик транспорт инфратузилмасида туб бурилиш бўлиши кутилмоқда.

«Ақлли» рақамлар марказлаштирилган тарзда назорат қилинади. Уларнинг ёрдамида автомобиль рақамлари ва автомобиллар ўғирланишига чек қўйилиши мумкин. Автомобиль ўғирланган тақдирда унинг рақамларига полиция излаб топишини енгиллаштирувчи қўшимча белгилар қўшилиши мумкин.