Ўзбекистон миллий термаси Марокашга 4 нафар мураббий — Кападзе, Қосимов, Арвеладзе, Бердиев бошчилигида боради

Футбол бўйича Ўзбекистон миллий терма жамоаси 23- ва 27 март кунлари Африканинг икки терма жамоаси, ЖЧ-2018 иштирокчилари Сенегал ва Марокаш термаларига қарши сафарда ўртоқлик ўйинларида майдонга тушади.

Мазкур ўйинларга футболчиларни саралаб олиш, уларни тайёрлаш ва олиб бориш ва мураббийлар штабини шакллантириш учун Ўзбекистон миллий терма жамоасига Темур Кападзе вақтинчалик бош мураббий вазифасини бажарувчи этиб тайинланганди.

ЎФА Темур Кападзеда ҳали мураббийлик тажрибаси йўқлигини инобатга олган ҳолда, Ўзбекистон футбол ассоциацияси биринчи вице-президенти Умид Аҳмаджонов томонидан тузилган тажрибали мутахассислардан иборат мураббийлар кенгаши Темур Кападзега терма жамоани бўлажак ўртоқлик ўйинларига тайёрлашга ёрдам беришини маълум қилди.

Мураббийлар кенгашидан «Бунёдкор» устози Миржалол Қосимов, «Пахтакор» бош мураббийи Шота Арвеладзе ва «Насаф» жамоаси бош мураббийи Рўзиқул Бердиев жой олган.

Қайд этилишича, Ўзбекистон миллий терма жамоасига чақирилган футболчилар аввал Тошкентда йиғинни бошлайди, кейин эса Миржалол Қосимов, Шота Арвеладзе, Рўзиқул Бердиев, Темур Кападзедан иборат мураббийлар кенгаши бошчилигида Марокашга йўл олади.