Ўзбекистон Президенти Шавкат Мирзиёевнинг «Олий таълим муассасаларига кириш учун номзодларни мақсадли тайёрлаш тизимини янада такомиллаштириш тўғрисида»ги 2017 йил 26 сентябрдаги 3290-сон қарорига мувофиқ олий ва ўрта махсус таълим вазирлигининг Ўрта махсус, касб-ҳунар таълими маркази тасарруфидаги ҳарбий-қурилиш йўналишидаги Самарқанд академик лицейи, ҳарбий техника йўналишидаги Фарғона академик лицейи ва ҳарбий юридик йўналишидаги Урганч академик лицейларини мудофаа вазирлиги тасарруфига ўтказиш бўйича вазифалар белгиланган эди, деб хабар беради мудофаа вазирлиги матбуот хизмати.
Жорий йилнинг 15 январь куни олий ва ўрта махсус таълим вазирлиги ҳамда мудофаа вазирлиги томонидан қўшма қарор имзоланиб, унга кўра юқорида таъкидлаб ўтилган таълим муассасалари тегишли тарзда мудофаа вазирлиги тасарруфига топшириш — қабул қилиш бўйича ишлар ташкиллаштирилди ва якунига етди.
Қайд этилишича, мазкур таълим муассасаларида ўқувчилар контингентини сифатли ва мақсадли бутлаш қуйидагиларни ўз ичига оладиган босқичма-босқич комплекс танлов амалга оширилади:
- Дастлабки танлов –мудофаа ишлари бўлимларида апрель ойида;
- Ҳарбий-касбий танлов – мудофаа ишлари бошқармаларида 1 майдан 15 июнга қадар;
- Тест синовлари ўтказиш – тегишли таълим муассасаларида Вазирлар Маҳкамаси ҳузуридаги давлат тест маркази томонидан Ўзбекистон Республикаси таълим муассасаларига қабул қилиш бўйича давлат комиссияси белгилаган муддатда.
- Таълим муассасаларига умумий таълим мактабларини жорий йилда 9-синфини битирган, умумий ўрта таълим тўғрисидаги шаҳодатномага эга бўлган, соғлиги жиҳатидан ўқишга лаёқатли деб топилган, танловдан муваффақиятли ўтган номзодлар ўқишга қабул қилинади.
Таълим олиш муддати икки йилни ташкил этади.
Изоҳ (0)