Аввал хабар берганимиздек, Ўзбекистон Президенти Шавкат Мирзиёев Тожикистонга давлат ташрифи давомида мамлакат парламенти қуйи палатаси раиси Шукуржон Зуҳуровни қабул қилди. Учрашувда икки давлат парламентлари ўртасидаги муносабатларни ривожлантириш масалалари муҳокама қилинди, дея хабар беради Asia-Plus.
«Ўзбекистон ва Тожикистон парламентлари ўртасидаги ҳамкорлик ва ҳамжиҳатлик кучайтиришимиз лозим. Парламент доим халқ иродасини ифодалайди, шу сабабли халқлар нимани истаётганини билиш муҳим. 15 йил давомида парламентда ишлаганман. Тажрибамдан келиб чиқиб айтаманки, аввал халқни эшитиш, сўнг қарор қабул қилиш керак, аксинча эмас», — деди Шавкат Мирзиёев.
Шукуржон Зуҳуров икки давлат ўртасида қўшничилик алоқалари тикланишида Шавкат Мирзиёевнинг хизматларини эътироф этди. Тожик халқи унинг эзгу нияти ва сиёсий иродасига муносиб баҳо беришини билдирди.
«Биз Тожикистонда эртами-кечми яхши кунлар келиши ва ҳаммаси ўз ҳолига қайтишига ишонардик. Ташрифингизни икки томон муносабатларидаги мисли кўрилмаган воқеа дейиш мумкин. Охирги қийин, мураккаб йиллар асрлар мобайнида мустаҳкамланиб келган дўстлигимиз тарихи олдида ҳеч нарса эмас», — таъкидлади Шукуржон Зуҳуров.
Изоҳ (0)