Австралиядаги пляждан дунёдаги энг қадимий шиша идишдаги мактубни топишди

Австралиянинг Веж-Айленд оролида 132 йил аввал жўнатилган шиша идишдаги мактубни топиб олишди, деб ёзади The Guardian.

Топилмани австралиялик Тоня Иллмен пляжда турмуш ўртоғи билан сайр қилиб юрганида аниқлаган. У қадимий шиша идишни уйига безак сифатида қўйиш учун олган, аммо ичидан немис тилидаги босма матн туширилган қоғоз бўлаги чиққан. Мактуб муаллифи топилма координаталари ва санасини ёзиб, унга юборишни сўраган.

Шиша идиш 1886 йилда Германиянинг Ҳинд океанини Австралия қирғоқларидан 950 км масофадан кесиб ўтаётган «Паула» елканли кемасидан ташлангани аниқланди. Кема сувости оқимлари харитасини яратишда қатнашган. Уни тузиш учун океанга минглаб шиша идишлар ташланган, вақт ўтиши билан уларнинг 662 таси топилган ва тадқиқотчиларга қайтариб юборилган.

Ғарбий Австралия музейи мутахассислари мактубнинг ҳақиқийлигини тасдиқлади.

Гиннесс рекордлари китобига кўра, шиша идишдаги энг қадимий мактуб денгизда 108 йил-у 138 кун ўтказган. Тоня Иллменнинг топилмаси денгизда бундан 24 йилга кўпроқ сузиб юрган бўлса-да, япониялик денгизчининг мактубига тегишли норасмий рекорддан ўзиб кета олмади: 1784 йилда юборилган мактуб Японияга 151 йил ўтиб — 1935 йилдагина етиб борган.