Тўрт ёшли қизини калтаклаб, буни видеога олган ота озодликдан маҳрум этилди

Тўрт ёшли қизини калтаклаб, буни видеога олган ота озодликдан маҳрум этилди, деб хабар беради ЎзА.

4 яшар қизалоқ отаси томонидан қаттиқ калтакланиши акс этган видеоёзув 11 ноябрь куни «Ўзбекистон» телеканалининг «Учбурчак» кўрсатувида намойиш этилган, шундан сўнг ижтимоий тармоқларда муҳокамаларга сабаб бўлган эди. Кейинроқ ота муқаддам ички ишлар органларида ишлагани маълум бўлганди.

Мазкур воқеадан кейин Чилонзор тумани прокурори Мубинабону ва унинг вояга етмаган акасининг манфаатини кўзлаб судга даъво аризаси киритди. Болага шафқатсиз муносабати боис Х.А Фуқаролик ишлари бўйича Учтепа тумани суди томонидан оталик ҳуқуқидан маҳрум этилди.

Шу билан бирга, Х.А нинг ўз қизини қийнаб, таҳқирлагани ҳолати юзасидан жиноят иши қўзғатилиб, у эҳтиёт чораси сифатида қамоққа олинган эди.

Жиноят ишлари бўйича Учтепа тумани судида мазкур жиноят ишига оид очиқ суд мажлиси бўлиб ўтди.

Судланувчи сўнгги сўзида қилмишидан қаттиқ пушаймон эканини, аслида фарзандларини яхши кўриши, ўша видеони икки йил давомида хорижда ишлаётган турмуш ўртоғини қайтариш мақсадида тасвирга туширганини айтди. Шундай қилсам, зора аёлим болаларига раҳми келиб қайтар, деган ниятда эдим, деди у.

Суд мажлисида иштирок этган судланувчининг қариндошлари сўзларига кўра, қизчанинг онаси у ҳали икки ёшга тўлмасдан уни отасига ташлаб, ўзи Туркия давлатига ишлашга кетган. Ота қизчаси ва ундан каттароқ бўлган ўғлига ўзи қараб келган. Аёлининг хорижда ёмон ишлар билан шуғулланганини билгач эркакнинг сабр косаси тўлган.

Лекин бу гапларнинг ҳеч бири болани уриш, қийнаш учун асос бўлолмайди, дейилади хабарда. Миллий қонунчиликда болалар ҳуқуқлари кафолатлари ҳимояланган бўлиб, уларга нисбатан ғайриқонуний ҳаркатлар содир этиш, ожизлигидан фойдаланиб таҳқирлаш, улар меҳнатидан фойдаланишга йўл қўйилмайди. Бундай қилмишларни содир этганлик учун жавобгарлик чоралари кўзда тутилган.

— Айбланувчи Жиноят кодексининг 110-моддасида назарда тутилган яъни «Қийнаш» билан боғлиқ жиноятни вояга етмаган шахсга нисбатан содир этган, — дейди Жиноят ишлари бўйича Чилонзор тумани суди судьяси Дилмурод Валиев. – Жазо тайинлашда барча ҳолатлар инобатга олинди. Судланувчининг аввал ножўя қилмишлар содир этмагани, яъни судланмагани, қилмишидан чин кўнгилдан пушаймон бўлгани, аслида болалари тақдирига бефарқ эмаслиги кабилар жазони енгиллаштирувчи ҳолат, деб баҳоланди. Х.А олти ойга озодликдан маҳрум қилинди.