Андижон вилоят ИИБ тезкор ходимлари 26 февраль куни ўтказган тадбир давомида ўзини «Азиз» деб таништирган шахс табиий газ тармоғи учун шахсий ҳисоб рақами ва ёнғин хавфсизлиги учун тегишли ҳужжатларни расмийлаштириб бериш эвазига фуқародан 700 минг сўм олаётганда ашёвий далил билан ушланди. Бу ҳақда ИИВ жамоатчилик ва ОАВ билан алоқалар бошқармаси маълум қилди.
Текширув давомида «Азиз» Олтинкўл туманида яшовчи, муқаддам Жиноят кодексининг 167-моддаси (ўзлаштириш ёки растрата йўли билан талон-торож қилиш) 2-қисми ва 209-моддаси (мансаб сохтакорлиги) 1-қисми билан судланган У.А.лиги маълум бўлди.
Шунингдек, 23 февраль куни У.А. ва Андижон шаҳар газ таъминоти корхонаси назоратчиси бўлиб ишлаган С.О. табиий газ учун қарздорлик бор деб баҳона қилиб, далолатнома тузиш билан қўрқитиб, А.Р.нинг хонадонидан 350 минг сўм олиб кетгани аниқланди.
Ҳозирда ҳолат юзасидан тергов ҳаракатлари ўтказилмоқда.
Изоҳ (0)