Тошкент шаҳридаги алоқа тарихи музейида бўлиб ўтган семинарда «Хавфсиз шаҳар» тизимини ривожлантириш концепцияси ҳамда Германиянинг Siemens концерни томонидан жамоат хавфсизлигини таъминлаш соҳасида ишлаб чиқилган сўнгги ишланмалар намойиш этилди. Бу ҳақда ЎзА хабар бермоқда.
Ахборот технологиялари ва коммуникацияларини ривожлантириш вазирлиги томонидан ташкил этилган тадбирда Фавқулодда вазиятлар, Ички ишлар, Соғлиқни сақлаш вазирликлари, Тошкент шаҳар ҳокимлиги, Германиянинг Ўзбекистондаги элчихонаси, Siemens концерни вакиллари, коммунал хизмат ходимлари ва журналистлар иштирок этди.
Семинарда ахборот технологиялари ва коммуникацияларини ривожлантириш вазири Азим Аҳмадхўжаев мамлакатда жамоат хавфсизлигини таъминлаш, ҳуқуқбузарликларнинг олдини олиш ва жиноятчиликка қарши курашишга қаратилган замонавий технологияларни жорий этиш бўйича кенг кўламли ишлар амалга оширилаётганини таъкидлади. Ушбу йўналишдаги ишлар самарадорлигини ошириш мақсадида илк таҳрирдаги «Хавфсиз шаҳар» ягона аппарат-дастурий мажмуасини яратиш ва уни янада ривожлантиришга доир концепция ишлаб чиқилди.
Концепцияга мувофиқ, йўлларда содир этиладиган ҳуқуқбузарликлар профилактикасини таъминлаш мақсадида Ички ишлар вазирлиги томонидан пойтахтдаги 280 чорраҳада фото ва видеокамералар ўрнатиш режалаштирилган.
Тошкент шаҳрининг ёнғин хавфсизлиги тизимига замонавий технологиялар жорий этилиши натижасида офатга қарши курашда тезкорлик ошди. Дастлаб реал вақт режимида пойтахт электрон харитасини мунтазам янгилаб турадиган шаҳар геоахборот тизими ишлаб чиқилди. Бу ёнғин ҳолатлари аниқланганда, турли туманлардаги ёнғин хавфсизлиги бўлимларининг фаолиятини мувофиқлаштириш ва ёнғинни бартараф этиш учун зарур бўлган техника сони ва турини аниқлаш имконини беради.
Пойтахтнинг баланд иморатларига ёнғинларни имкон қадар эртароқ пайқаш имконини берувчи юқори аниқликдаги махсус камералар ўрнатилиши ёнғин хавфсизлигини таъминлаш энг истиқболли йўналишлардан бири бўлди. Ҳозирги кунда Тошкентнинг турли туманларида шундай камералар ўрнатиляпти. Улар ёрдамида 17 ёнғин ҳолати эрта аниқланди ва бартараф этилди.
Семинар доирасида Siemens концернининг «Хавфсиз шаҳар» концепцияси, логистика ва интеллектуал электрон тармоқларига доир техник ишланмалари намойиш этилди. Концерн мутахассислари турли мамлакатларда бундай тизимларни жорий этиш тажрибаси ва уларнинг натижалари ҳақида сўзлаб берди.
Изоҳ (0)