КХДР Давлат кенгаши раиси Ким Чен Ин ва унинг марҳум отаси Ким Чен Ир 1990 йилларда Ғарб мамлакатларига виза олиш учун бошқача исм-шариф остида берилган Бразилия паспортларидан фойдаланган. Бу ҳақда Reuters Европа махсус хизматларидаги манбасига таяниб хабар берди, деб ёзади «ТАСС».
Иккала паспорт ҳам 1996 йилда Бразилиянинг Прага (Чехия)даги элчихонаси томонидан берилган. Агентлик ушбу ҳужжатларнинг биринчи саҳифалари фотонусхаларини эълон қилди. Шахсни аниқлаш бўйича замонавий технологиялар Бразилия паспортларида Сан-Паулу шаҳри фуқаролари дея қайд этилган КХДРлик мансабдорларнинг шахсини тасдиқлаган.
Ким Чен Ин ва Ким Чен Ир ушбу паспортлардан айнан қайси мамлакатларга виза олишда фойдаланганлигига, виза олишга муваффақ бўлган-бўлмаганлигига аниқлик киритилмади. Аммо «камида иккита Ғарб мамлакати»га виза олишга уринганлиги айтилмоқда, холос.
КХДРнинг Бразилиядаги элчихонаси изоҳлардан бош тортган. Хабарларга кўра, Бразилия ташқи ишлар вазирлиги ушбу ахборотни текширмоқда.
Чет эл матбуоти маълумотларига кўра, Ким Чен Ин 1996—2001 йилларда Берн (Швейцария)даги Халқаро мактабда ўрта таълимни олган.
Изоҳ (0)