Россиялик миллиардер Алишер Усмонов суперзамонавий туристик мажмуа — «Кўҳна ва боқий Бухоро» лойиҳасида беғараз ҳомийлик шарти билан иштирок этмоқда. Бу ҳақда Sputnik мухбирига Ўзбекистон Туризмни ривожлантириш давлат қўмитаси раҳбари Азиз Абдуҳакимов маълум қилган, деб ёзади «Правда Востока».
А.Абдуҳакимовнинг айтишича, Алишер Усмоновнинг иштироки туристик зонани кейинчалик ҳомий бошқарувига топширишни назарда тутмайди.
Объект тўлиқ Ўзбекистон томони ихтиёрида бўлади.
«У (Алишер Усмонов) ушбу лойиҳанинг ҳомийси сифатида, дейлик меценат тарзида иштирок этмоқда. Катта лойиҳани амалга ошириш режалаштирилган, бюджет ҳам аниқ, аммо аниқ рақамлар лойиҳалаштириш ишлари натижаларига кўра маълум бўлади», — деб қайд этди А.Абдуҳакимов.
Янги туристик зона Ғиждувон кўчаси ва «Кўҳна ва боқий Бухоро» маданий мажмуаси оралиғида жойлашган 10 гектар жойда барпо этилади. Зона майдонида пастқаватли замонавий меҳмонхоналар, маданий-соғломлаштириш ва савдо-кўнгилочар марказларини барпо этиш режалаштирилган. Уларда чет эллик сайёҳларга кун-у тун хизмат кўрсатиш ва мароқли ҳордиқ чиқариш таъминланади.
Туристик зонада турли шоулар, тарихий воқеаларни акс эттирган театрлаштирилган концерт томошалари намойиш этилади ва фольклор ансамбллари билан бирга замонавий эстрада хонандаларининг чиқишлари, либослар намойиши ва бошқа томошабоп тадбирлар ташкил этилади.
Бухоронинг қадимий қисми тўлиқ бепул Wi-Fi билан қопланади.
Изоҳ (0)