Қозоғистонда бир яшар эгизак фарзандларини ўлдирган ота-она колонияда тўлиқ муддатга қолади. Апелляция коллегияси судланганларнинг ҳукмни қайта кўриб чиқиш ҳақидаги аризасини рад этди, деб ёзади Kazakhstan Today.
Нашр эслатишича, эгизакларнинг жасадлари 2017 йилнинг 11 сентябрида Олмаотадаги хонадонлардан бирида совитгичдан топилган эди. Эртаси куниёқ болаларни ўлдиришда гумон қилиниб, уларнинг онаси Алла Волченко ва эри, Ўзбекистон фуқароси Эмиль Гильмутдинов ҳибсга олинди. Иккаласи ҳам айбини тан олди. Қотиллик сабабларидан бири болалар маст ота-онасига ухлашга халал бергани бўлган.
Алла Волченконинг норасмий эри болаларни 5 сентябрдаёқ ўлдирган. Салават ва Ринат исмли эгизакларни ўлдиришдан аввал Эмиль Гильмутдинов хотинини катта ўғли Равиль билан бирга сайр қилишга жўнатиб юборган. Ўлдирилган болалар жасадларини эркак спорт сумкасига солиб қўйган.
2 ёшли Равиль эса полициячилар томонидан шаҳардаги болалар майдончаларининг биридан топилган. Уни Олмаота ҳокимлиги ҳузуридаги болалар муассасаси қаровига беришган.
2017 йил охирида суд Гильмутдиновни максимал хавфсизлик таъминланган колонияда ўташ шарти билан 20 йилга, Волченкони — ўртача хавфсизлик таъминланган колонияда ўташ шарти билан 18 йилга озодликдан маҳрум қилди.
Яқин орада суд Алла Волченкони оналик ҳуқуқидан маҳрум қилмоқчи.
Изоҳ (0)