Самарқанд вилоятида автомобиль давлат рақамларини ўғирлаб, уларни қайтариб бериш учун пул талаб қилаётган фирибгарлар гуруҳи пайдо бўлди. Товламачилар бундай «хизмат» учун 5 доллар товон пули талаб қиляпти, дея хабар беради «Халқ сўзи».
Самарқанд вилоятида яшовчи ва UzNews нашрига мурожаат қилган жабрланувчига кўра, у 12 февраль куни ўз уйидан унча узоқ бўлмаган жойда қолдирган Lasetti автомашинасида давлат рақамлари йўқлиги, ён қисмида қирилган жойлар пайдо бўлганини пайқаб қолади. Бундан ташқари, олд ойнаси томонда Qiwi-ҳамён орқали товон тўлаши шартлиги тўғрисида қуйидаги мазмунда хат қолдирилганини кўради.
«Автомобильингиз рақамини қайтариб олишни истасангиз, қуйидагиларни бажаринг:
+77762599592 QIWI-электрон ҳамёнига 5 доллар ( сўм ёки рубль эмас) юборинг. Буни Ўзбекистондаги хоҳлаган банкда амалга ошириш мумкин;
Жўнатишингиз билан @urustama телеграм манзили ёки rustammalikov@yandex.ru электрон почтасига ёзинг;
Агар буларнинг барчасини қилсангиз, давлат инспекцияси, ЙҲҲБ, милицияга ариза беришга кетадиган вақт ва кучингизни тежаган бўласиз.
Бундай ноқулайлик учун узр сўраймиз. Пулингизнинг ярми хайрли ишлар (меҳрибонлик уйлари, кам таъминланганлар, етимхоналар)га сарфланади».
Ўғрилар эса ушбу тўлов амалга оширилгандан сўнг бир сутка давомида давлат рақами қолдириб кетилган аниқ манзилни юборишни ваъда берган.
Манбага кўра, охирги пайтда Самарқандда автомобиль давлат рақамларини ўғирлаш билан боғлиқ 30 та ҳолат кузатилган.
Изоҳ (0)