«Адолат» газетасида, сўнг унга асосланиб интернет сайтлари, ижтимоий тармоқларда олтиариқлик Ҳасанбой Юнусовнинг ғаллазорни пайҳон қилган қўйлари «тақдири» ҳақида шов-шувли хабарлар тарқатилди. «Дарё» мухбири Муҳаммаджон Обидов масалани ўрганди.
Воқеа гувоҳларининг айтишича, аслида фермер Қурбонали Отажоновга қарашли 10 гектар ғалла майдонида икки юздан зиёд қўй киритиб юборилган. Бундан хабар топган туман ИИБ ходимлари уларнинг 65 тасини ушлаб кета олган. Кейинчалик маъмурий судда бу масала кўрилиб қўй эгаларига жарима белгиланган.
Ҳасанбой Юнусов жаримани тўласа-да ҳалигача қўйларини қайтариб ололмаётганини тасдиқлади. Ҳуқуқни ҳимоя қилувчи идорага яқин «Дарё» манбаси суд қарорига томонлардан бири шикоят ёзган бўлиши ва дастлабки қарор кейинги инстанцияда қайта кўрилиб қонуний кучга киргунча қўйлар эгасига қайтариб берилмаётган бўлиши мумкинлигини айтди. Лекин жабрланувчи фермер Қурбонали Отажонов суд қарорида белгиланган жарима аслида етказилган зарардан бир неча марта кам бўлса-да шикоят қилмаганини билдирди.
10 гектар янги суғорилган ғалла майдонининг катта қисми пайҳон бўлди, бу энди ниш уриб чиққан дон уруғи ўсишдан тўхтади дегани. Бу майдондан олинадиган ҳосилдорлик кескин камайиб кетади. Демак, ерни ҳайдаш, культивация қилиш, бароналаш, маҳаллий ўғитлаш, уруғлик сепиш, агат олиш, минерал ўғитлаш, бир неча бор суғориш харажатлари қопланмай қолади. Шу майдон ҳосилдорлиги йилни зарар билан якунлаши эҳтимоли бор. Матбуот, интернет ва ижтимоий тармоқларда ғаллазорни пайҳон қилган қўйлар «тақдири»га катта этибор қаратиляпти-ю, пайҳон бўлган ғаллазор, зарар кўраётган, ҳуқуқбузарликдан азият чекаётган фермерлар манфаати четлаб ўтилиб масалага бир ёқлама ёндошилмоқда. Холбуки, Марказий Фарғона чўллари ҳудудидаги экин майдонларимизни биринчи марта пайҳон қилаётганлари йўқ. Биз иш ҳақи тўлаб назоратчи-қоровул қўйишга мажбур бўлдик. Лекин 10 гектар майдонни бир киши қўриқлай олмаяпти. Журналистлар ғаллани пайҳон қилиш гуноҳ эканлиги ҳақида ёзиб мол-қўй эгаларини инсофга чақирса бўлмайдими?Қурбонали Отажонов, «Шохимардон» фермер хўжалиги раҳбари«Дарё» мухбири суҳбатлашган Олтиариқ туманидаги кўплаб фермерлар бу фикрни тасдиқлади ва шу йилнинг ўзида ғалла пайҳони билан боғлиқ бешта ҳолатни гапириб берди. Яқиндагина «Оқбўйра» ҚФЙ ҳудудидаги «Барака холис» фермер хўжалиги ғаллазорларини пайхон қилган чорва эгасига маъмурий суд 2 800 000 сўм жарима солган. Пайҳонгарчиликдан зада бўлган фермерлар К.Солиев, А.Сатторов туман ҳокимига ғаллазорларни тунда қўриқлашда амалий ёрдам кўрсатиш ҳақида ариза билан мурожаат қилган. Фермер Қурбонали Отажонов ҳам 2017 йил декабрь ойида туман ҳокимига шу ҳақда ариза билан мурожаат қилган экан.
Ўзбекистон Республикаси Вазирлар Маҳкамасининг «Қишлоқ хўжалиги экинзорларининг пайҳон қилинишига қарши курашишни кучайтириш чора тадбирлари тўғрисида»ги қарорида шундай дейилган:
Қорақалпоғистон Республикаси Вазирлар кенгаши ва вилоятлар ҳокимликлари:
- чорва молларини экин майдонлари четларида ўтлатилишини қатъиян тақиқласинлар;
- экинзорларнинг пайҳон ва нобуд қилиниши ҳолатлари аниқланган тақдирда чорва моллари, автотранспорт, қишлоқ хўжалиги техникаси ёки экинзорларни пайҳон ва нобуд қилишнинг бошқа воситалари эгаларини аниқлаш юзасидан тезкор чора-тадбирлар кўрсинлар ҳамда уларга нисбатан қонун ҳужжатларида назарда тутилган жиноий жавобгарликкача бўлган жавобгарлик чораларини кўриш учун материалларни тегишли органларга тақдим этсинлар.
- Жойларда қишлоқ хўжалиги экинзорларининг пайҳон қилинишига қарши курашиш бўйича ишларни ташкил этиш юзасидан шахсий жавобгарлик Қорақалпоғистон Республикаси Вазирлар Кенгаши Раиси, вилоятлар ҳокимлари, Қорақалпоғистон Республикаси ички ишлар вазири, ички ишлар вилоятлар бошқармалари ва туманлар бўлимлари бошлиқлари, шунингдек тегишли туманлар ҳокимлари зиммасига юклансин.
Маълум бўлишича, Ҳасанбой Юнусовга тегишли қўйларнинг барчаси соғ-омон, уларга махсус ажратилган қўйбоқарлар кеча-кундуз қарамоқда, ҳатто уларнинг бир нечтаси қўзилаган.
Изоҳ (0)