АҚШнинг Вашингтон штати олимлари сувдан водород ажратиб олишнинг тез ва қиммат бўлмаган усулини ишлаб чиқди. Олимлар кимёвий реакция ўтказиш учун никел ва темирдан иборат нанокўпик шаклидаги катализатордан фойдаланишни таклиф қилмоқда. Бу ҳақда «ТАСС» хабар берди.
Водород янгиланувчи энергия манбаи ҳисобланади. У коинотда энг кўп тарқалган кимёвий элемент бўлишига қарамасдан, деярли соф ҳолда учрамайди. Водородни электролиз жараёнида олиш энг тоза усул бўлиб, бунинг учун катализаторлар — платина каби Ерда кам учрайдиган металлар зарур. Катализатор ва энергия сарфи сабабли сув электролизи саноат миқёсига етмаган.
Олимлар катализатор сифатида арзон ва кенг тарқалган металлардан фойдаланган. Сув билан алоқага киришувчи катта юза ҳисобига никел ва темирдан иборат нанокўпик ажралиш реакциясини юзага келтиради. Тадқиқотчиларнинг таъкидлашича, бу материал самарали ишлайди ва бошқа катализаторларга нисбатан кам энергия талаб қилади.
Изоҳ (0)