Қозоғистоннинг «31-канали» мухбирлари Ақтўбедаги автобус ёнғинидан омон қолган қозоғистонлик ҳайдовчилардан бири — Мақсат Пернебековнинг онаси ва яқинлари билан учрашди. Бу ҳақда «Nur.kz» хабар бермоқда.
Пернебековнинг онасининг сўзларига кўра, ҳодисадан бироз аввал ўғли ҳозир қаерда, ташқарида ҳаво ҳарорати қандай экани, манзилгача қанча йўл қолгани ҳақида видеохабар йўллаган.
«Мен бутун Ўзбекистон халқидан, ҳалок бўлган йигитларнинг оналаридан кечирим сўрайман», — дейди Мақсатнинг онаси кўзда ёш билан.
Мақсат Пернебековнинг қариндошлари унинг омон қолганидан телевизор орқали хабар топган, шундан сўнг у билан боғланишга муваффақ бўлишган. Маълум бўлишича, ҳайдовчи қўли ва бошидан куйиш жароҳатини олган.
«У ухлаётган, автобусни эса шериги ҳайдаб кетаётган бўлган. Воқеа қандай бўлганини билмайман, деяпти. ‘Мақсат, наҳотки қутқариб қолишнинг имкони бўлмаган бўлса, нега эшиклар очилмади?’, деб сўрадим. У бўлса: ‘Опача, мен билмайман, автобусдан чиқдим ва у портлади’, деди», — дейди Пернебековнинг опаси.
Қайд этишларича, Мақсат Ақтўбеда ёниб, 52 ўзбекистонликнинг умрига зомин бўлган «Сетра» автобусини 4 йилдан бери ҳайдарди, унда кўп бора Қозонга борган, йўлни яхши билган. Қариндошларнинг сўзларига кўра, Пернебеков ёлланма ҳайдовчи эди — автобус эгаси унга ҳар рейс учун 60 минг танга пул тўлаган.
Эслатиб ўтамиз, Ақтўбеда автобусда ёниб кетган 52 ўзбекистонликнинг жасади 19 январь оқшомида Тошкентга олиб келинди. Ҳозирги вақтда улардан 49 нафарининг шахси аниқлангани айтилмоқда.
Изоҳ (0)