ЎзА Тошкент шаҳридаги автобусларнинг ҳаракатланишида учраётган қоидабузарликлар ҳақида танқидий мақола эълон қилганди. «Тошшаҳартрансхизмат» акциядорлик жамияти бошқаруви раиси А.Жўраев жавоб хатида қисқа фурсат ичида камчиликлар бартараф этилгани ва келгусида амалга ошириладиган вазифалар белгиланганини билдирди.
Унда, жумладан, бундай дейилади:
«Мазкур мақолада келтириб ўтилган камчиликлар 2018 йилнинг 16 январь куни ‘Тошшаҳартрансхизмат’ АЖ раҳбарлари ва тизимда фаолият олиб борувчи ходимлар иштирокида видеоселектор йиғилишида муҳокама қилинди. Йиғилишда мақолада кўрсатиб ўтилган камчиликларга йўл қўйган ва бу билан ўзининг лавозим мажбуриятларига совуққонлик билан қараган икки нафар масъул ходим лавозимидан озод этилди. Бир нафарига ҳайфсан эълон қилинди.
Мақолада танқидий қайд этилган 58-сонли йўналишда ҳаракатланадиган автобусларнинг 2018- йилнинг 1 январидан 15 январигача бўлган даври GPS дастури орқали таҳлил қилинди. Унга кўра, мазкур йўналиш ҳайдовчилари томонидан ушбу давр мобайнида 90 маротаба тезликни меъёридан ошириш ҳолатлари аниқланди. Йўл ҳаракати қоидаларини қўпол равишда бузиб, йўловчилар ва бошқа ҳаракат иштирокчиларининг ҳаётини хавф остига қўйган мазкур йўналиш ҳайдовчилари билан қайтадан йўриқнома ўтказилди.
Йўриқномага асосан, ҳар бир ҳайдовчига мақолада кўрсатиб ўтилган камчиликларни қайта такрорланиши ҳолати кузатилса, улар билан тузилган меҳнат шартномаси бир томонлама бекор қилиниши тўғрисида сўнгги маротаба огоҳлантирилди.
8-сонли йўналишда ҳаракатланадиган автобусларнинг 2018 йилнинг 1 январидан 15 январигача бўлган даври ҳам GPS дастури орқали таҳлил қилинди. Таҳлил натижаларига кўра, мазкур йўналиш ҳайдовчилари томонидан ушбу давр мобайнида эрталабки ва кечки тиғиз вақтда Чилонзор метроси оралиқ бекатида 4 дақиқадан, 10 дақиқагача туриш ҳолати аниқланди. Натижада мақолада танқидий кўрсатиб ўтилган ҳолат қисман ўз тасдиғини топди.
Жамият таркибидаги 4, 7, 12-автобус саройлари тасарруф бўлими ва ҳаракат хавфсизлиги бўлими ходимлари билан биргаликда Чилонзор метро бекатида ҳар ҳафтанинг душанбадан шанба кунига қадар соат 07-00 дан 09-00 гача ва 17-00 дан 19-00 гача навбатчилик жадвали тасдиқланди».
Изоҳ (0)