15 январь куни Ўзбекистон Миллий матбуот марказида ўтказилган матбуот анжуманида Туризмни ривожлантириш давлат қўмитаси раиси Азиз Абдуҳакимов мамлакат аэропортларида сайёҳлар учун амалга оширилаётган қулайликлар ҳақида сўзлаб берди.
Бизнинг аэропортларда кўплаб хизматлар ташкил этилмаган. Келган меҳмонларимиз учун аэропортларда интернетга уланиш, шу ернинг ўзида сайёҳлар учун харита, сим-карталарни сотиб олиш имконияти, бизнинг компанияларимиз томонидан таклиф этилаётган турлар, Ўзбекистонда бўлаётган турли маданий тадбирлар тўғрисида маълумотлар мавжуд эмас. Шу масалалар ҳозирда ечила бошланди. Тошкент, Самарқанд ва бошқа аэропортларда бизнинг махсус ахборот марказларимиз ўрнатилди. Мобил алоқа операторлари билан, турк компаниялари билан келишув амалга оширилди. Биз қисқа муддатда, ягона стандартда аэропортларда хизматларни жой-жойига қўямиз.Ҳозир яна кўплаб эътирозлар тушаётган масала: аэропортдан чиққанда таксичилар қўполроқ муомалада бўлади. Бу масала бўйича ҳам биз аэропорт раҳбарияти билан келишиб олдик. Қисқа муддатда у ерда ҳам тартиб ўрнатилади.
Миллий авиакомпаниямиз жуда катта ишларни олиб борди ва 1 январда қизил ва яшил йўлакчалар ўрнатилди. Олдин туристларимиз аэропортларда 1,5 соат вақт йўқотарди. Ҳозирги бизнинг ўлчамларимизга кўра, сайёҳларимиз барча жараёнлар (чегара, божхона)дан 21 дақиқада ўтиб, шаҳарга чиқиш имкониятига эга.
Азиз Абдуҳакимов, Туризмни ривожлантириш давлат қўмитаси раиси
Мавзуга доир: 2017 йилда Ўзбекистонга 2,5 миллиондан ортиқ сайёҳ келди
Изоҳ (0)