Самарқанд вилояти она ва бола скрининг марказига кейинги йилларда энг сўнгги русумдаги тиббий ускуналар ўрнатилиб, ҳомиладор аёлларни скрининг текширувидан ўтказиш учун кенг имкониятлар яратилди. ЎзА мухбирлари бу ердаги имкониятлардан қанчалик оқилона фойдаланилаётганини аниқлаш мақсадида марказга ташриф буюрди.
Соат 10:30 ларда бинога кириб борилганида марказ ходимлари директор ҳузурида мажлисда эканлиги айтилган. Зал эса тиббий кўрик учун келган аёллар билан гавжум бўлган.
«Кеча селектор йиғилиш бўлганди, мажлисда айтилган гапларни ходимларга етказаётган эдим», – деб вазиятга изоҳ беради марказ директори Г.Эшқобилова.
Иш вақтида, шунча одам навбат кутиб турганида, йиғилиш муҳимми ёки кўрик, деган савол эса жавобсизлигича қолган.
Марказ директорининг айтишича, текширувдан ўтиш учун келаётган ҳар бир аёл электрон рўйхатга олиш тизими орқали навбатга ёзилиб, белгиланган вақтда кўрикка киради. 2016 йилдан буён фойдаланилаётган бу тизим эндиликда онлайн режимига ўтказилиб, туманлардан келаётган ҳомиладор аёлларнинг ўша ерда навбатга ёзилиши, белгиланган вақтда марказга келиши режалаштирилмоқда.
Аммо марказда навбат кутаётган аёллар билан ўтказилган суҳбат давомида бу тизим аламда ишламаётганлиги маълум бўлган.
«Соат ўнларда келган эдим. Эшик олдидаги ходим қўлимдаги тумандан берилган йўлланмани кўриб, қайси хонага киришим кераклигини айтди. Лекин навбат ҳақида ҳеч қандай қоғоз берилгани йўқ. Қарийб бир соатдан буён навбатимни кутиб турибман», – дейди паяриқлик З.Болиева.
Ультратовуш текшируви учун навбатда турган ўндан ортиқ ҳомиладор аёлнинг икки нафаридагина навбатга олинганлиги ҳақидаги қоғоз бўлган (бу ҳам мухбирлар келганидан сўнг улар берилган). Лекин навбат рақами қайд этилган қоғоздаги ёзув инглиз тилида ёзилгани сабаб уни берган ходимдан бошқа, ҳеч бир бемор ўқий олмаслиги аниқ.
Вилоят марказидан 110 чақирим узоқликдаги Нарпай туманидан келган ҳомиладор аёлларнинг ҳам қўлига навбати ёзилган рақам берилмаган. Улар ҳам шу ерда ўтирган кишилардан сўраб навбатини кутиб турган.
«2016 йилда жорий этилган тизим марказда шу аҳволда ишлаётган бўлса, онлайн тизимдан умид қилса бўладими?», — дейилади хабарда.
Изоҳ (0)