«Маҳалла» хайрия жамоат фондининг Тошкент шаҳар бўлими берган маълумотига кўра, 2016 йилда Тошкентда уч мингга яқин оилавий ажримлар қайд этилган бўлса, бу кўрсаткич 2017 йилга келиб мингтага камайган, деб хабар берди «Telegraf.uz».
Тошкент шаҳридаги 505 маҳалла фуқаролар йиғини ҳузурида ташкил этилган яраштириш комиссияларининг саъй-ҳаракати билан ўтган йилда 907 та оилавий ажримлар олди олинди.
Оилавий ажримлар таҳлил этилганда, етишмовчилик, оилани боқа олмаслик эмас, уларнинг аксарияти ўзига тўқ, бойлиги ўзига етарли хонадонларда юз бераётгани аён бўлган. Мисол учун, кўплаб оилавий келишмовчиларнинг «келиннинг сепи муносиб келмаганмиш», «келиннинг отаси куёвга яхши ёрдам бермасмиш...», «куёвига машина совға қилмоқчи бўлган қайнота ўз ваъдасида турмабди» каби баҳоналар сабаб бўлган.
Бундан ташқари қайноналарнинг ўта талабчанлиги, қайнона-келин можароси, аксарият ажримларда эса Тошкент шаҳрида доимий рўйхат ўтиш масалалари, ёшларнинг ортиқча орзу-ҳавасга ҳирс қўйиши, ёки улар ўртасидаги ўзаро меҳр-муҳаббат ва ҳурматнинг йўқолганлиги каби қатор омиллар ҳам сабаб бўлаётгани аниқланган.
Изоҳ (0)