Сирдарё вилояти Гулистон туманида 2017 йил учун белгиланган 1 минг 987 янги иш ўрнининг 1 минг 783 таси яратилди. Бу ҳақда туман ҳокими Абдумавлон Ибодуллаевнинг ЎзАда чоп этилган мақоласида маълум қилинди.
Туманда 2017—2018 йилларда комплекс ривожлантириш дастури доирасида саноат ва қишлоқ хўжалиги соҳаларида 90 лойиҳадан 81 таси ишга туширилиб, 181 янги иш ўрни ташкил этилди. Яна 9 лойиҳа бўйича тегишли далолатномалар тузилмоқда.
2017 йилда туманни ижтимоий-иқтисодий ривожлантириш дастурига асосан хизмат кўрсатиш ва сервис йўналишларида 65 лойиҳа амалга оширилди, бу 165 янги иш ўрни яратиш имконини берди.
Ишлаб чиқилган инвестиция лойиҳаларидан ҳозирда 3 лойиҳа ишга туширилган бўлса, 3 таси турар жой тоифасига ўтказилиб, ундан турар жой сифатида фойдаланаётган аҳоли бениҳоя мамнун.
Жорий йилда иккита 2 қаватли, 20 та умумий майдони 4 сотихли янгиланган лойиҳалар асосидаги уй-жойлар фойдаланишга топширилиб, 52 оила уй тўйларини нишонлади.
«Афсуски, экспорт бўйича белгиланган топшириқлар ижроси таъминланмай қолди. Натижада жорий йилнинг 11 ойида маҳсулотлар экспорти 232,6 минг доллар ўрнига атиги 181 минг долларни ташкил этди. Бундай ҳолат бизнинг бу борадаги ишимизни қайта кўриб чиқиш, муаммолар устида жиддий иш олиб боришимиз зарурлигини кўрсатади», — деб ҳоким сўзларини келтиради ЎзА.
Изоҳ (0)