Шавкат Мирзиёев 22 декабрь куни Ўзбекистон тарихида биринчи марта парламентга мурожаат йўллади. Тўрт соат давом этган нутқ «Ўзбекистон 24» телеканали орқали тўғридан-тўғри эфирга узатилди, шунингдек, оммавий ахборот воситаларида ёритиб борилди.
Ўзбекистонликлар нутқни фаол кузатиб борди, ижтимоий тармоқлар орқали мурожаатнинг у ёки бу жиҳатларига, айтилган фикр ва ташаббусларга муносабат билдирди. «Дарё» диққатга сазовор фикрларни бир саҳифага тўплади.
Халқаро пресс-клуб раиси Шерзод Қудратхўжаев Президентнинг парламентга мурожаати Ўзбекистон учун янги амалиёт эканлигига эътибор қаратди:
Бундай мурожаатлар одатда бошқа давлатларда доимий кузатилади. Лекин Ўзбекистонда бундай амалиёт илк бор бугун қўлланди. Ўзбекистон раҳбари тўрт соат давомида тик турган ҳолда, мамлакат парламенти, ҳукумати ва халқига тўғридан-тўғри мурожаат қилди. Мирзиёев дунё тажрибасини Ўзбекистонда ноу-хау қилди.Шунингдек, журналист мурожаатнинг аҳамиятини тушунтириш учун Англиянинг машҳур сиёсатчиси Уинстон Черчилл билан параллел келтирди:
Ҳар бир сиёсатчининг маълум бир маърузаси унинг фаолиятида белгиловчи, муҳим ролга эга бўлади. Масалан, Уинстон Черчиллнинг 1946 йил 5 мартдаги Фултон нутқи дунё тартиботини бутунлай ўзгартириб юборган.Ҳуқуқшунос ва блогер Хушнудбек Худойбердиев эса Мартин Лютер Кингни эсга олди:Ўзбекистон Президенти Шавкат Мирзиёевнинг бугунги маърузаси, унинг сайланганига бор-йўғи бир йил бўлишига қарамасдан, яқин ўтмишдаги вазиятни теран таҳлил қилиб, яқин келажакка аниқ вазифаларни белгилаб берувчи, чуқур мушоҳадали нутқ бўлди, десак тўғри бўлади.
Тарихда нутқлар кўп бўлган. Лекин улар доим ҳам эсланавермайди. Чунки кўплаб нутқлар амалда ҳеч қандай ўзгариш олиб келмайди.Сардор Салим, сиёсатшунос:Бироқ шундай нутқлар бўладики, унинг ижобатини кутиш шарт эмас — ўша нутқнинг ўзи амал сифатида қабул қилинади, катта сиёсий оқибатларни келтириб чиқаради, тарихда қолади.
Масалан, Мартин Лютер Кингнинг 1963 йил 28 августдаги «I have a dream» («Менинг орзуйим бор») нутқи тарихдаги энг зўр нутқлардан бири саналади...
Бугунги нутқнинг кўлами юқорида эсланган нутқлар каби бутун дунёга таъсир қиладиган даражада ўзгаришларга олиб келмас, бироқ Ўзбекистон миқёсида давлат ривожини янги босқичга олиб чиқишга катта ҳисса қўшади. Бу нутқ халққа эртанги кунга ишонч беради, дилларда умид уйғотади, мудроқ қалбларни уйғотади, сўниқ кўзларга учқун беради.
Шавкат Мирзиёевнинг бугунги нутқи, сиёсий оқибатлари бўйича, Биринчи Президент Ислом Каримов Мустақилликни эълон қилган мажлисдан кейинги иккинчи ўринда турса керак.
Санжар Саид, журналист ва блогер:
Тушга яқин кўзим илиниб, бир соатча ухлаб қолибман. Уйғонсам ҳаммаёқни янгилик босиб кетибди. Президент парламент баҳона халққа бевосита мурожаат қилаётган экан. Ўзимни замондан орқада қолган, янгиликлар, ўзгаришлардан бехабар одамдек ҳис қилдим.Дониёр Рўзметов, блогер, бизнес-консултант, Франция:Жуда ҳаяжонли дақиқалар. Президент кўнглимиздаги, тилимиздаги гапларни айтаяптики, гўёки қандайдир яширин профил билан биз мансуб бўлган виртуал оламни доим кузатиб, муҳокамаларимизда иштирок этаётгандек, биз билан ёнма-ён, ҳамфикрдек.
Кўнглимизда шунча ўзгаришлар амалда бўлармикан, деган шубҳа бўлишига қарамасдан, умид ва ишонч ҳам тирик. Ҳатто Кореяга кетиш-кетмасликка ҳам иккиланиб қолдим. Ҳозир чет элда юрганларда бир-икки йилда Ўзбекистон таниб бўлмас даражада ривожланиб кетса-я, деган ўйноқи хаёл ҳам йўқ эмас.
Ойликларимиз минг-икки минг долларга чиқиб, уй-жой, машина, тўй ташвишларидан сал узоқлашиб, хотиржамлик, кенг феъллик билан фикр юритадиган, воқеа-ҳодисаларга босиқлик, вазминлик, салобат билан муносабатда бўладиган вақтлар яқиндек кўриняпти.
Президент гапирса, кўзлар очилади!Зафар Ҳошимов, тижоратчи, «Korzinka.uz» раҳбари:Ўша куни водий билан Тошкент ўртасидаги пост ҳақида ёзганимизда, муаммолар мавжудлигини айтганимизда, айримлар худди «ватан хоини»га чиқариб қўяёзганди. «Ўша ердаги қўпол муомала қиладиганлар хавфсизлигимизни сақлаяпти, раҳмат дегин», деган маънода оғзимизга урган эди.
Бугун бу муаммонинг мавжудлигини Президентимиз айтгач, у ҳақиқатдан ҳам мавжуд бўлиб қолди. Бизнинг оғзимизга урганларнинг эндиги фикрлари менга қизиқ бўляпти.
Бир пайтлар нотариус ҳақидаги мақоласи учун Жамшид Ниёзовга қанча озор берганлари ёдимда. Энди буниям Президент айтгач, ҳамма муаммонинг мавжуд эканлигини кўриб қолди.
Ҳозирда Тошкентдаги прописка муаммоси, вилоятликларга муомала ва муносабат муаммосини ҳам кўпчилик кўрмаяпти. Ажабмас, бир кун келиб Президент бу муаммо ҳақда ҳам гапирса ва айрим амалдорларнинг кўзлари очилиб, бу муаммони ҳам кўра бошласалар!
Илгари «Подшонинг қадами етган жойлар обод бўлиб кетади», деб айтганларини эшитганман. Эндиликда кўпчилигимиз Президент гапирса, кўзлар очилиб, кўринмаган муаммолар кўриниб кетаётганлигига гувоҳ бўлмоқдамиз.
Президентимизнинг бошлари омон бўлсин. Юрт равнақи ва халқ фаровонлиги учун ўз олдига қўйган эзгу ниятлари рўёбга айланаверсин!.
Президентнинг сўзлари, илгари сурган фикр ва ғоялари, ўтган бир йилда амалга оширилган ислоҳот ва амаллар кўлами (шунча ўзгаришларни атиги бир йил ўзига қамраб олганига ақл бовар қилмайди), шубҳасиз, Шавкат Миромоновичда Ватанимизни яқин келажакда минтақавий ривожланиш марказига айлантира оладиган дунёқараш, прогрессив ёндашишлар ва холис ниятлар мавжудлигидан далолат бериб турибди.Беҳзод Ҳошимов, иқтисодиётчи, Висконсин университети бизнес мактаби тадқиқотчиси:Президентнинг бугунги нутқлари, ҳеч қандай шубҳасиз, бу маслак сари қўйилган тарихий ва инқилобий қадамдир. Бу нутқ ўтаётган ислоҳотлар, жараёнларнинг бардавом бўлиши гарови ва яққол шаҳодатидир.
Шу онларда қалбимни умид, шижоат, юртим, халқим ва раҳбаримиз билан фахрланиш туйғулари тўлдириб турибди.
Бугун Ўзбекистон яна бир бор мустақил бўлди, десам муболаға бўлмайди! Ҳаётимда нутқ эшитиб, бу даражада таъсирланмаган эдим. Барчамизни шундай ажойиб ўзгаришлар билан табриклайман! Бу тарихий нутқ Ватанимиз келажагига катта таъсир қилишига аминман.
Изоҳ (0)