Фарғонадаги «Чимён» сиҳатгоҳида журналистларнинг «Ҳаракатлар стратегияси: ислоҳотлар жараёни ва ОАВ» мавзусидаги ўқув-медиалагери ташкил этилди. Бу ҳақда «Дарё» мухбири хабар бермоқда.
Журналистлар ижодий уюшмаси, Олий Мажлис ҳузуридаги НТТ ва фуқаролик жамиятининг бошқа институтларини қўллаб-қувватлаш жамоат фонди, Фарғона вилоят ҳокимлиги томонидан ташкил этилган ва еттинчи бор ўтказилаётган тадбирда Қорақалпоғистон Республикаси, Навоий, Бухоро, Самарқанд, Тошкент, Наманган, Андижон ва Фарғона вилоятларидан келган 100 дан ортиқ журналист иштирок этмоқда.
Семинарни Журналистлар ижодий уюшмаси Фарғона вилоят бўлими раиси Муҳаммаджон Обидов олиб бормоқда. Уюшма раиси Саъдулла Ҳакимов «Ўзбек матбуоти олдидаги долзарб вазифалар ва журналист масъулияти» мавзусида сўз юритди.
«Ташқаридан назар: таҳлил ва таклиф» йўналишида илк бор хорижий мамлакатларда фаолият олиб бораётган ўзбек журналистларига фикр-мулоҳазаларини билдириш имконияти яратилди. Тадбирда «Америка овози» радиоси муҳаррири Навбаҳор Имомова ўз видеомаърузаси билан иштирок этди. Туркиянинг Anadolu агентлиги мухбири Бахтиёр Абдукаримов эса ҳамкасблари билан бевосита мулоқотда бўлди.
«Матбуотда, очиқлик, ошкоралик, ҳозиржавобликнинг ўрни ва аҳамияти» мавзусида Халқаро пресс клуб раҳбари Шерзод Қудратхўжаев видеомаъруза қилди. Шунингдек, медиалагерда иштирок этаётган маҳаллий газеталар тақдимоти бўлиб ўтди.
Бир ҳафта давом этадиган тадбирнинг кейинги кунларида Ўзбекистон Миллий университети доценти Аҳмаджон Мелибоев, «Жамият» газетаси бош муҳаррири Беҳзод Шукуров, «Қишлоқ ҳаёти» газетаси бош муҳаррири Чори Латипов, шунингдек, хорижий ОАВ вакиллари чиқишлари кутилмоқда.
Изоҳ (0)