2018 йил 1 февралдан алоҳида хўжалик юритувчи субъектларга Ўзбекистон Республикаси ҳудудига озиқ-овқат маҳсулотлари олиб киришда берилган индивидуал божхона, солиқ ва бошқа имтиёз ва преференцияларни бекор қилиш режалаштирилмоқда. Бу Ўзбекистон Республикаси Бош прокуратураси томонидан тайёрланган Президент фармони лойиҳасида кўзда тутилган. Фармон лойиҳаси Норматив-ҳуқуқий ҳужжатлар муҳокамаси порталига жойланди.
Шунингдек, 2018 йил 1 февралдан Ўзбекистон Республикаси Вазирлар Маҳкамаси томонидан республика ҳудудига озиқ-овқат маҳсулотлари олиб киришда муайян хўжалик юритувчи субъектларга индивидуал божхона, солиқ ва бошқа имтиёз ва преференциялар тақдим этишни кўзда тутувчи қарорлар қабул қилишни тақиқлаш ҳам кўзда тутилмоқда.
Республиканинг барча ҳудудларида давлат-хусусий шериклик асосида махсус омборхона, сақлаш иншоотлари, совутиш камералари ташкил этилади, озиқ-овқат маҳсулотларини қайта ишлаш ва қадоқлаш бўйича замонавий, юқори технологик энергия тежовчи ускуналар ўрнатилади.
Ҳужжат лойиҳасига мувофиқ, 2018 йил 1 февралдан бошлаб:
ижтимоий аҳамиятга эга озиқ-овқат маҳсулотларини Ички истеъмол бозорида нарх-навони барқарорлаштиришга кўмаклашиш жамғармаси маблағлари ҳисобига сотиб олиш, шунингдек, давлат стратегик ва сафарбарлик захирасидаги янгилаш талаб этиладиган озиқ-овқат маҳсулотларини сотиш фақатгина товар-хом ашё биржаларининг очиқ электрон савдо тизими орқали амалга оширилади;
республика товар-хом ашё биржаларида истеъмол товарларининг сотилиши (харид қилиниши) борасидаги тақиқ бекор қилинади;
республика товар-хом ашё биржаларининг очиқ электрон савдолари орқали озиқ-овқат маҳсулотларини сотиб олиш ва сотишда улгуржи савдо қилиш учун лицензия талаб этилмайди;
режалаштирилаётган озиқ-овқат маҳсулотларининг харидлари, Жамғармага маблағлар тушумлари ва харажатлари тўғрисидаги батафсил маълумотлар ҳар ойда Ўзбекистон Республикасининг Ягона интерактив давлат хизматлари порталида эълон қилиб борилади;
биржа брокерлари тижорат банкларига мижоз – норезидентлар номидан товар-хом ашё биржалари электрон савдоларида маҳсулот сотишдан тушган маблағлари ҳисобидан хорижий валютани сотиб олиш (сотиш) учун талабнома бериш, норезидент – юридик шахслар эса Ўзбекистон Республикаси тижорат банкларида ҳисоб рақами очиш ва товар-хом ашё биржалари электрон савдоларида маҳсулот сотишдан тушган маблағлари ҳисобидан хорижий валютани сотиб олиш (сотиш) ҳуқуқига эга.
Ўзбекистон Республикасининг божхона чегараси орқали товарларни олиб кириш тизими ва жараёнини танқидий ўрганиб чиқиб, ортиқча тўсиқ ва ғовларни бартараф этиш, маҳсулотларнинг божхона расмийлаштирувини имкон қадар соддалаштириш ва экспорт-импорт операциялари харажатини қисқартириш режалаштирилмоқда.
Изоҳ (0)