Ўзбекистонда 2017 йилда инфляция даражаси 13-14 фоиз бўлиши кутилмоқда. Бу ҳақда Халқаро пресс клубнинг навбатдаги сессияси давомида иқтисодиёт вазирининг биринчи ўринбосари Мубин Мирзаев маълум қилди, дея хабар беради ЎзА.
«Унинг ўсиш сабаблари нималардан иборат? Биринчиси, йиллар давомида нархларни либераллаштириш бўйича чора-тадбирларнинг ортга сурилиб келаётгани билан боғлиқ. Жорий йилда айрим товарлар ва хизматларга белгиланган нархларни либераллаштириш бўйича амалий ишлар қилинди. Иккинчиси, Халқаро валюта фонди услубига ўтишимиз ва ҳисоб-китоблар шу асосда амалга оширилиши ҳам инфляция даражасига таъсир кўрсатади», — деди Мубин Мирзаев.
Қайд этилишича, ноябрь ойида умумий инфляция даражаси 2 фоизни ташкил этган бўлса, унинг 0,5 фоизи бензин нархи ошиши ҳисобига тўғри келмоқда. Мамлакатда бензин нархи ўртача 39 фоизга ошган.
Ўзбекистонда айни пайтда 1 литр бензиннинг ўртача нархи 0,52 долларга тўғри келмоқда. Қозоғистонда бу кўрсаткич 0,54, Беларусда 0,63, Россияда 0,69, Тожикистонда 0,75, Украинада 1,03 долларни ташкил этмоқда.
Изоҳ (0)