29 ноябрь куни Андижон шаҳридаги «Олтин водий» тўйхонасида Ўзбекистонда хизмат кўрсатган артист Юлдуз Абдуллаева ҳамда хонанда Ойхон Эшонхонова иштирокида «Эл аро инсон азиз» номли концерт дастури ташкил этилди, деб хабар беради Солиқ қўмитаси ахборот хизмати.
«Водий тантана медиа» масъулияти чекланган жамияти раҳбари Озодбек Мирзаев ташаббуси билан уюштирилган концерт тадбири зарур ҳужжатлар асосида расмийлаштирилмагани аниқланди.
Бундан ташқари, рухсатномасиз ташкил этилган тадбир учун сотувга чиқарилган чипталар давлат солиқ инспекциясида рўйхатдан ўтказилмаган эди.
Вилоят давлат солиқ бошқармаси, «Ўзбекконцерт» давлат муассасаси вилоят бўлими ҳамда Андижон шаҳар давлат солиқ инспекцияси ходимлари ҳамкорликда ушбу концертнинг тўғри ташкил этилиши, сотилган чипталарнинг нақд пул тушуми юзасидан мониторинг-хронометраж тадбирини амалга оширди.
Тадбир давомида иштирокчилардан олинган чипталар саноқдан ўтказилиб, ҳар бири 50 минг сўмдан эканлиги, жами 600 нафар фуқарога сотилганлиги маълум бўлди.
«Водий тантана медиа» масъулияти чекланган жамияти раҳбари Озодбек Мирзаев тушунтириш хатида уч кун муддатда томошадан тушган 30 миллион сўм нақд пул маблағлари банк кассаларига топширилиши юзасидан расман огоҳлантирилганлигини билдириб, йўл қўйилган хато учун узр сўради.
Изоҳ (0)