Гулистонда «Давлат ва жамият ўртасидаги мулоқот ривожида омбудсманнинг ўрни» мавзусида семинар бўлиб ўтди. Бу ҳақда ЎзА хабар бермоқда.
Олий Мажлиснинг Инсон ҳуқуқлари бўйича вакили (омбудсман), Европада хавфсизлик ва ҳамкорлик ташкилотининг Ўзбекистондаги лойиҳалари координатори офиси, Сирдарё вилояти ҳокимлиги, вилоят касаба уюшмалари ташкилотлари бирлашмаси ҳамкорлигида ташкил этилган тадбирда ҳуқуқни муҳофаза қилиш идоралари, вилоят хотин-қизлар қўмитаси, «Маҳалла» хайрия жамоат фонди, «Нуроний» жамғармаси вилоят бўлимлари масъуллари, ОАВ ходимлари иштирок этди.
Семинарда 2017—2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегияси мазмун-моҳияти ва аҳамиятига алоҳида эътибор қаратилиб, у асосида қабул қилинган дастурлар, амалга оширилаётган ишлар хусусида атрофлича маълумот берилди.
Ўзбекистон Республикаси Олий Мажлисининг Инсон ҳуқуқлари бўйича вакили (омбудсман)нинг Сирдарё вилоятидаги минтақавий вакили К.Оқбўтаевнинг «Омбудсманнинг минтақавий вакил институти ва унинг маҳаллий давлат ҳокимияти органлари ва фуқаролик жамияти институтлари билан ҳамкорлик йўналишлари» мавзусидаги маърузаси тингланди.
– 2017 йилнинг 9 ойи давомида Олий Мажлиснинг Инсон ҳуқуқлари бўйича вакили (омбудсман)нинг Сирдарё вилояти бўйича минтақавий вакилига 13 ёзма ва 7 оғзаки мурожаат келиб тушди ва барчаси ўз вақтида ижобий ҳал этилди, – дейди К.Оқбўтаев. — Масалан, Сирдарё тумани Ширин маҳалласида яшовчи фуқаро Нозигул Баротованинг жорий йил 20 июль куни маҳалласидаги умумий фойдаланиш уйига доимий рўйхатга қўйишдаги муаммолар ва ушбу масалада қонуний ёрдам кўрсатилишини сўраб йўллаган аризаси атрофлича ўрганилди ва доимий рўйхатга қўйилиши таъминланди.
Семинар доирасида ариза билан мурожаат қилган фуқаролар қабул қилинди ва муаммолар ечимини топишда амалий кўмак кўрсатилди.
Тадбирда суд-ҳуқуқ тизимини ислоҳ қилиш, фуқароларнинг ижтимоий фаоллигини ошириш, Олий Мажлиснинг Инсон ҳуқуқлари бўйича вакили (омбудсман)нинг минтақавий вакиллари фаолиятини янада такомиллаштириш, давлат ва жамоат ташкилотлари билан ҳамкорлигини мустаҳкамлаш юзасидан фикр алмашилди.
Изоҳ (0)