Ўзбекистонлик таниқли футболчи Тимур Кападзе футболчилик фаолиятини якунлашга қарор қилди. «Локомотив» шарафини ҳимоя қилаётган ярим ҳимоячи бугун бўлиб ўтадиган Ўзбекистон Кубоги финалининг «Бунёдкор»га қарши ўйинида сўнгги бор яшил майдонга чиқади.
36 ёшли футболчи Ўзбекистон миллий терма жамоаси сафида энг кўп майдонга тушганлар рўйхатида қайд этилади. У бош жамоа шарафини 119 та беллашувда ҳимоя қилишга муваффақ бўлган. Кападзе 2015 йилги Осиё Кубогидан кейин термадан кетишга қарор қилганди.
Фаолияти давомида Тимур Кападзе 12 бор Ўзбекистон чемпионлигини қўлга киритди. Бу ютуқларига футболчи Тошкентнинг уч гранд клуби — «Пахтакор», «Бунёдкор» ва «Локомотив»да, шунингдек, Фарғонанинг «Нефтчи» клубида эришди. Шунингдек, 9 бор мамлакат кубогини боши узра баланд кўтарди.
Кападзега хорижда тўп суриш ҳам насиб қилган. У 2011—2012 йилги мавсумларни Жанубий Кореянинг «Инчхон Юнайтед» клубида, 2012—2013 йилги мавсумларни Амирликларнинг «Шаржа» жамоасида ўтказди. 2013 йилдан 2015 йилгача эса Қозоғистоннинг «Актобе» жамоасида тўп сурди. 2013 йил Қозоғистон чемпиони бўлди, 2014 йил Қозоғистон Суперкубогини қўлга киритди. 2013 йил қозоғистонликлар унга чемпионатдаги энг яхши легионер футболчи совринини топширди.
Кападзе 2015 йилдан буён «Локомотив» шарафини ҳимоя қилиб келаётганди. «Темирйўлчилар» Тимур билан кетма-кет икки бор Ўзбекистон чемпионлигини қўлга киритди. Бунга қадар «Локомотив» мамлакат олтин медалларига эга чиқа олмаганди.
Тимур Кападзе мураббий Тоҳир Кападзенинг ўғли ҳисобланади.
Изоҳ (0)