Францияда танасининг 95 фоизи куйган эркакка эгизак акасининг териси кўчириб ўтказилди

Францияда шифокорлар танасининг 95 фоизи куйган беморга эгизак акасининг терисини муваффақиятли кўчириб ўтказиб, унинг умрини сақлаб қолди. Бу ҳақда «РИА Новости» хабар берди.

Хабарга кўра, бундай операция дунёда биринчи марта ўтказилган. Операция Париждаги Сан-Луи касалхонасида, бир неча босқичда бўлиб ўтган. Пластик жарроҳ Морис Мимуннинг сўзларига кўра, терининг 95 фоизи кўчириб ўтказилган.

Бемор 2016 йилнинг сентябрь ойида иш вақтида куйиб қолган, унинг акаси эса дарҳол донор бўлишга розилик берган. Шифокорлар дастлаб бир нечта тайёргарлик операциясини ўтказган, кейин эса уч босқичда тери кўчириб ўтказилган. Умумий ҳисобда донор ўз танасидан 50 фоиз терисини берган. Ака-ука гомозигот эгизаклар бўлгани учун бир хил ДНКга эга бўлган. Кўчирилган терининг битмаслик ҳолати кузатилмаган.

Айни вақтда 33 ёшли бемор касалхонадан уйга қайтган. У реабилитация курсини ўтамоқда ва мустақил ҳаракатлана олади.