Ўзбекистон миллий терма жамоасига ким бош мураббий бўлади? ЎФФ музокарадагилар номини ошкор қилди

ЎФФ мамлакат миллий терма жамоасига бош мураббий излаш ишлари билан банд. Ташкилот матбуот хизмати бу борада кимлар билан музокара олиб борилаётгани масаласига ойдинлик киритди.

Кўринишидан Ўзбекистон миллий терма жамоасини жаҳон тан олган мутахассислардан бири қабул қилиб олади. Номзодлар орасида Европанинг гранд клубларида фаолият олиб борган таниқли мутахассислар бор.

Дан Петреску

Россия, Польша, Хитой ва БАА чемпионатларида ишлаган руминиялик мутахассис ҳозир 49 ёшда. У айни пайтда Руминиянинг «ЧФР» клубида фаолиятини давом эттирмоқда. Бунга қадар мураббий сифатида Амирликларнинг «Ан-Наср», Россиянинг «Кубань», «Динамо» жамоаларида, Хитойнинг «Цзянсу Сайнти» клубида, Қатарнинг «Ар-Араби»сида ва Польшанинг «Висла» жамоасида ишлаган. У 2008, 2009 ва 2011 йилларда Руминиянинг энг яхши мураббийи сифатида тан олинган.

Славалюб Муслин

Муслин Сербия миллий термасини ЖЧ—2018 га олиб чиқиб, кутилмаганда истеъфо берганди. 64 ёшли мутахассис ўз вақтида Бельгиянинг «Стандарт», Россиянинг «Амкар», «Краснодар», «Химки», «Локомотив», Франциянинг «Ланс», «Бордо» каби номдор жамоаларида ишлаган.

Мутахассис 1999 йил Марокашнинг «Ража» клубини мамлакат чемпиони қилган. «Црвена Звезда» билан 2000 ва 2001 йиллар Югославия чемпиони бўлган, 2002 йил «Левски» жамоасини Болгария чемпиони қилиб, 2004 йил энди Сербия ва Черногория чемпионатининг олтин медалларига эга чиққан.

Саудиядан кейин Сербия термаси ҳам ўзини ЖЧ—2018 га олиб чиққан мураббийни истеъфога чиқарди

Миодраг Радулович

2010 йил Тошкентнинг «Пахтакор» клубини бошқарган 50 ёшли черногориялик мутахассис 2015 йилдан буён Ливан термасига устозлик қилиб келаётганди. У яқиндагина Ливан билан тарихий натижа қайд этиб, жамоани тарихда илк бор Осиё Кубогининг финал босқичига саралаш ўйинлари орқали олиб чиқди.

«Пахтакор»нинг собиқ бош мураббийи Миодраг Радулович Ливан термаси билан тарихий натижа қайд этди

Радулович Кувайтнинг «Ал-Жаҳра», «Казма», Португалиянинг «Боавишта», Россиянинг «Динамо» клубларида ҳам ишлаган. 2012 йилги мавсум Черногориянинг «Будучност» клуби билан мамлакат чемпионлигини қўлга киритган.

Анжело Алессио

2016 йилдан буён «Челси»да ёрдамчи бўлиб ишлаб келаётган Алессио ҳам номзодлар орасида бор. Бунгача у Италия терма жамоасида ҳам Антонио Контега ёрдам берганди. Мазкур мутахассис билан Туриннинг «Ювентус» клубида ҳам бирга ишлаган. У ҳозир 52 ёшда.

Бернд Шторк

54 ёшли германиялик мутахассис 2008 йилдан 2011 йилга қадар Қозоғистонда фаолият олиб борди. Жумладан, икки йил Қозоғистон миллий термасига бошчилик қилди. 2015—2017 йиллар давомида Шторк Венгрия термаси мураббийи сифатида ишлади. Бунгача 2006 йил бир мавсум Дортмунднинг «Боруссия» клубини бошқарганди.

Бранко Иванкович

ЎФФ билан битим тузиши мумкин бўлганлар орасида 63 ёшли хорватиялик Иванкович ҳам бор. У айни вақтда Эроннинг «Персеполис» клубида фаолият олиб бормоқда. Бунгача Хорватиянинг «Динамо», «Риека», БААнинг «Ал-Ваҳда», Саудиянинг «Ал-Иттифоқ», Хитойнинг «Шандонг Лунен», Германиянинг «Ганновер» клубларини бошқарган. Миллий термалар таснифида 1998 йил Хорватия термасини қабул қилиб олиб, 1999 йилгача фаолият олиб борган. Эрон миллий термасида икки марта, умумий ҳисобда 6 йил ишлаган. Орада форс олимпиячиларини ҳам бошқарган.

Унинг бошқарувида Эрон олимпиячилари 2002 йил Осиё Ўйинларида зафар қучган. Эрон миллий термаси Осиё Кубогининг 2004 йилдагисида 3-ўринни олган. Иванкович, шунингдек, Хорватия ва Хитой чемпионатларида ҳам зафар қучган.

Славен Билич

Бир неча кун олдин Лондоннинг «Вест Ҳэм» клубидан истеъфога чиққан 49 ёшли мураббий, 2006—2012 йиллар давомида Хорватия миллий термасида ишлаган ва мухлислар оғзига тушган. Билич, шунингдек, Москванинг «Локомотив» ва Истанбулнинг «Бешиктош» клубларида фаолият борган. Унинг жамоаси Туркияда икки марта бронза медалини қўлга киритган, Хорватияда чемпион бўлган.

Вальтер Маццари

Италиялик 56 ёшли мураббий ҳам Билич каби шу йил АПЛ клубидан кетди, яъни, «Уотфорд»дан. Бунгача у Италиянинг «Интер», «Наполи», «Сампдория» каби клубларини бошқарган. 2012 йил «Наполи» билан Италия Кубогида зафар қучган.

Берт ван Марвейк

Ва ниҳоят, Саудия Арабистони термасини Жаҳон Чемпионатига олиб чиқиб, кейин истеъфо берган голландиялик 65 ёшли мураббий. У Голландиянинг «Фейеноорд», Германиянинг «Боруссия Дортмунд» ва «Гамбург» клубларида ишлаган. Голландия миллий термасини 4 йил бошқариб, 2010 йил шогирдларини ЖАР—2010 финалига қадар олиб борган ва ҳал қилувчи ўйинда Испаниядан енгилган — 0:1. 2002 йил «Фейеноорд» Марвейк билан УЕФА Кубогида зафар қучган, 2008 йил Голландия Кубогини ютган.

Ўрган, Бабаян: Берт ван Марвейк Саудияни Жаҳон Чемпионатига олиб чиқди ва истеъфо берди