Футбол бўйича Ўзбекистон Олий Лигаси 2018 йилги мавсумдан бошлаб Супер Лига деб юритилади. Бу ҳақда ЎФФ матбуот хизмати ПФЛ Ижроқўмига асосланиб, маълумот берди.
2018 йилдан бошлаб Ўзбекистон Олий Лигасида 12 та футбол клуб қолади. Қолганлар қуйи лигага сургун бўлади
Аввалроқ ПФЛ Олий Лига жамоалари сони 12 тага камайиши борасида баёнот берганди. Супер Лигада ҳам бу кўрсаткич сақлаб қолинади. Бироқ тур ўйинлари бунгача айтилгани каби 33 тани ташкил қилмайди, балки 38 тага етказилади. Яъни, жамоалар ўзаро 3 давра ўйнаш билан мавсумни тугатмайди.Эндиликда 33 та турдан кейин 1—6-ўринни эгаллаган жамоалар чемпионлик масаласини ҳал қилиш учун ўзаро яна 5 та учрашув ўтказади. 7—12-поғона соҳиблари эса қуйи лигага тушиб кетмаслик учун худди шундай 5 та ўйинда майдонга тушади. Ўзбекистон Биринчи Лигаси ҳам келаси мавсумдан бошлаб ўз номини ўзгартириб, ПРО-Лига деб юритилади.
Ўзбекистон ПРО-Лигасида 16 та жамоа иштирок этади. Мамлакат Олий Лигасининг 2016 йилдаги форматидек, ПРО-Лигада жамоалар 15 та уй ва 15 та сафар учрашувида иштирок этади.
Бунгача ПФЛ Олий Лигани 11-ўриндан паст поғона якунлаган клуб қуйи лигага тушиб кетиши ва қуйи лига пешқадами элитага қўшилиши ҳақида айтганди. Мазкур қарорга ҳам ўзгартириш киритилди. Унга кўра, Супер Лигадан 1 та клуб автоматик равишда учирма бўлади. Ундан олдинги ўрин эгаси эса ПРО-Лиганинг 2-ўрнини банд этган клуб билан уй ва сафар ўйинида беллашиб кўради, ғолиб Супер Лигада ўйнайди.
ПФЛ Супер Лигадаги 34—38-турлар қандай кўринишда ўтишига ойдинлик киритмаган. Яъни, 33-турдан кейин чемпионлик учун кураш олиб борадиган ва қуйи лигага тушиб кетмаслик ҳаракатида бўладиган жамоаларнинг қайси майдонда ўйнаши айтилмаган. Масалан, бу нейтрал майдон кўринишида бўладими ёки мезбон жамоа қуръа ташлаш йўли билан аниқланадими — маълум эмас.
Изоҳ (0)