Туркия полицияси 12 ноябрь, якшанба куни Истанбул шаҳрида ИШИД террорчилик ташкилотига алоқадорлиги гумон қилинаётган 32 кишини ҳибсга олди, деб хабар беради «Корреспондент.net».
Ҳибсга олинганларнинг барчаси хорижий мамлакатлар фуқаролари эканлиги айтилмоқда. Уларнинг қайси миллатга мансублигига аниқлик киритилмаган.
Гумонланувчилар Истанбулнинг олтита туманида ўтказилган рейдлар давомида қўлга олинган. Тинтув натижасида, шунингдек, бир қатор ҳужжатлар аниқланган.
Туркия ҳуқуқ-тартибот органлари сўнгги бир ҳафта ичида ИШИДнинг мамлакатдаги тарафдорларига қарши курашни кучайтирди.
10 ноябрь куни бир қатор шаҳарларда ИШИДга алоқаси борлиги гумон қилинаётган 109 киши қўлга олинди, улардан 82 нафари хорижий мамлакатлар фуқароларидир.
Туркия ички ишлар вазири Сулаймон Сойлининг маълум қилишича, сўнгги йил ичида Туркия полицияси ИШИДга алоқадор 4000 кишини қўлга олган. Улардан 1129 нафарига нисбатан қамоқ жазоси қўлланилган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)