«Ростех» футуристик трамвай лойиҳасини ёпди. У ҳеч қачон ишлаб чиқарилмайди

Россиянинг «Ростех» компанияси таркибига кирувчи «Уралвагонзавод» корхонаси томонидан биринчи марта 2014 йилда намойиш этилган Russia One трамвайи ҳеч қачон серияли ишлаб чиқарилмайди. «Ростех»нинг алоҳида топшириқлар бўйича директори Василий Бровконинг хабар беришича, лойиҳа ўз харидорини топмаган, деб ёзмоқда TJournal.

Бровко муаммонинг дизайнерлар ва ишлаб чиқарувчилар ўртасидаги фикрлар номувофиқлигидалигини тан олган. R1 трамвайи ҳаммага ёққан. Бироқ у бозорга чиқмади ва чиқмайди.

Директор камчиликлар сифатида трамвайда юргизиш қисмининг йўқлигини, у таъмирлаш учун жуда нозиклигини айтиб ўтган.

Бровко R1 нинг кўплаб ғоялари «Уралвагонзавод»нинг бошқа лойиҳаларида қўлланилиши мумкинлигини ваъда қилди.

Эҳтимолий харидорлар орасида Москва шаҳри ва Ингушетия ҳокимияти ҳамда бошқа вилоятлар бўлган. Бироқ улар билан транспорт воситасининг савдоси бўйича бирорта ҳам шартнома тузилмаган.

R1 биринчи марта 2014 йилда саноат кўргазмасида намойиш этилган ва уни Россия бош вазири Дмитрий Медведев кўздан кечирган эди.

Трамвайни Wi-Fi, GPS-навигатор, HD кузатув камералари, кондиционерлар билан жиҳозлаш режалаштирилган эди.