BBC журналистларига сув остида акула ҳужум қилди (видео)

BBC телеканалининг «Мовий сайёра 2» лойиҳаси суратга олиш гуруҳи нобуд бўлган китнинг танаси билан сув остида нима юз беришини ўрганиш учун батискафда денгиз тубига шўнғиди. Мазкур жараённинг энг таъсирли ҳолатлари YouTube’га жойлаштирилди.

Сув ости қайиғи 700 метр чуқурликка шўнғиб кит жасадига яқинлашди. Шу пайтда нобуд бўлган кит танасини акулалар ғажиётганининг гувоҳи бўлди.

Йиртқичларга кутилмаган меҳмонлар ташрифи ёқмади. Улар бир муддат объектни кўздан кечирди ва сув ости қайиғи ойнасини «таққиллата бошлади».

«Сув ости кемаси жуда мустаҳкам, бироқ улар шунчалик каттаки, қўрқиб кетяпман», — дейди гуруҳ аъзоларидан бири.

Акулалар сув ости қайиғига бир неча марта ҳужум уюштирди. Уларнинг ойна билан тўқнашувида ичкари томондан қўрқинчли овозлар эшитилган.

Охир-оқибат йиртқичлар чекинди, бироқ интернет фойдаланувчилари мазкур кадрлар уларда ўчмас таассурот қолдирганини тан олган.