8 ноябрь куни Тошкентдаги Wyndham Tashkent меҳмонхонасида инвестицион муҳитни яхшилаш, эришилган натижаларни ўрганиш ва устувор йўналишларни белгилаб олишга бағишланган халқаро давра суҳбати бўлиб ўтди.
Инвестицион жараён иштирокчиларини бирлаштирган мазкур тадбир, давлат ва халқаро ташкилот мутахассислари, шунингдек энг йирик хорижий ва маҳаллий корхона вакиллари ўртасида Ўзбекистондаги инвесторларнинг манфаатларини кўзловчи долзарб масалаларни муҳокама қилиш учун очиқ майдончага айланди.
Форум Ўзбекистон Республикаси Олий Мажлиси Сенати, Инвестициялар бўйича давлат қўмитаси, БМТ Тараққиёт Дастурининг «Ўзбекистон Республикасида инвестицион муҳитни яхшилаш» лойиҳаси ва ЕТTБнинг Ўзбекистондаги ваколатхонаси билан ҳамкорликда Халқаро пресс клуб ахборот кўмагида ташкил этилди.
Иқтисодий либераллаштириш жараёнларида мамлакатнинг инвестицион жозибадорлигини ошириш 2017—2021 йилларда Ўзбекистон Республикасини ривожлантиришнинг бешта устувор йўналишлари бўйича ҳаракатлар стратегиясининг муҳим босқичларидан бири ҳисобланади.
Олиб борилган чора-тадбирлар натижасида 2011—2016 йиллардаги кўрсаткичлар 3,3 дан 1,9 миллиард АҚШ долларигача бўлган хорижий инвестициялар оқимининг пасайиш тенденциясини ўзгартириш имконини берди.
Давра суҳбати иштирокчиларининг таъкидлашича, инвестицион салоҳиятнинг ўсишига тўсқинлик қилувчи асосий омиллар соҳага оид миллий қонунчиликнинг такомиллашмагани, хусусан қонунчилик меъёрларининг инвестиция соҳалари бўйлаб номуносиб тарқалиши, Қонун ости ҳужжатларининг қонунларга зидлиги инвестицион қонунчилик самарадорлигининг пасайиб кетишига таъсир этибгина қолмай иқтисодиёт ривожи ва мамлакат имижига салбий таъсир кўрсатмоқда.
Шу муносабат билан Инвестициялар бўйича давлат қўмитаси томонидан Олий Мажлис Сенати ва БМТ Тараққиёт Дастурининг экспертлари кўмагида Инвестиция Кодексини ишлаб чиқишда иш олиб борадиган идоралараро ишчи гуруҳи тузилди.
Изоҳ (0)