«Сток Сити»нинг собиқ футболчиси Тейшейра 25 ёшида юрак хуружидан вафот этди

Бразилиялик футболчи Дионатан Тейшейра 25 ёшида оламдан ўтди. Унга юрак хуружи ташҳиси қўйилди.

Тейшейра 1992 йил Бразилияда туғилган бўлиб, маҳаллий «Лондрина» клуби орқали катта футболга кириб келган. Бу вақт давомида у Бразилия U17 термаси шарафини ҳимоя қилган.

Тейшейра катта футболни Словакиянинг «Кошице» клубида бошлади. Кейинроқ бу мамлакатнинг бир қатор клубларида тўп суриб, Словакия фуқаролигини олди ва Словакия U21 термаси шарафини ҳимоя қилди.

2014 йил Англиянинг «Сток Сити» клуби уни 400 минг фунт эвазига қўлга киритганди. Уч мавсум давомида Дионатан АПЛда 2 тагина ўйин ўтказди. Кейин эса «Флитвуд Таун»га ўтиб кетди.

2017 йил Тейшейра Молдованинг «Шериф» клуби билан шартнома имзолаганди. Ҳимоячи бу борада жамоасининг 10 та ўйинида иштирок этиб улгурганди. Бироқ унинг организми юрак хуружига дош бера олмади.

Футболчи аввал ҳам юраги билан боғлиқ муаммоларга дуч келганмиди ёки йўқ — маълум эмас.