Куала-Лумпур аэропортида Шимолий Корея етакчиси Ким Чен Иннинг акаси Ким Чен Намни ўлдирганликда айбланаётган тўрт киши КХДР фуқароларидир ва улар дипломатик каналлардан фойдаланиб, жиноят содир этилган куни Малайзияни тарк этган. Бу ҳақда тергов гуруҳи вакили Ван Азирул Низам Олий суд мажлисида маълум қилди, деб ёзади «ТАСС».
Унинг сўзларига кўра, «уларнинг барчаси Куала-Лумпурга турли вақтларда — тахминан қотилликдан икки ҳафта олдин келиб, мамлакат ҳудудини бир вақтда — Ким Чен Нам ўлдирилган сана — 13 февралда тарк этган».
«Тергов чоғида аниқланишича, КХДРнинг Малайзиядаги элчихонаси ходими ва Air Koryo авиакомпанияси вакили тўрт нафар айбланувчи учун Жакартага рейс чипталарини сотиб олган ва уларга юборган, шунингдек, уларга дипломатик йўлакдан ўтишда ёрдам қилган», — деди терговчи.
КХДРнинг тўрт фуқароси Интерпол линияси бўйича қидирувга берилган, аммо ҳозиргача ҳеч қандай натижага эришилмаган.
Изоҳ (0)