Қирғизистон собиқ бош прокурори Аида Салянованинг укаси Улан Салянов Бишкекда қуролли ҳужум натижасида ҳалок бўлди, деб ёзади «Интерфакс» собиқ бош прокурорнинг адвокати Улан Жумаковга таяниб.
Унинг сўзларига кўра, кечаси соат 3 ларда ниқоб таққан номаълум шахслар парламент депутати Аида Салянованинг укаси яшайдиган уйга қуролли ҳужум уюштирган. Олган жароҳатлари натижасида 1975 йилда туғилган Улан Салянов вафот этган.
Номаълум шахслар марҳумнинг ўғли Абайни ўғирлаб кетиб, номаълум томонга олиб қочган. Кейинроқ адвокат аниқлик киритишича, Абайни топишган, у соғ-омон бўлган.
Салянова Қирғизистон адлия вазири лавозимини эгаллаган вақтларда ўз ваколатини суиистеъмол қилганликда айбланиб, 10 октябрь куни суд қилинган эди. У мол-мулкини мусодара қилиш шарти билан беш йилга қамалди. Аммо у вояга етмаган қизини тарбиялаётгани учун, бола 14 ёшгача тўлгунича, суд ҳукмининг ижроси кечиктирилди.
Изоҳ (0)