Австралия ҳудудида йирик теракт содир этилиши кутилмоқда. Бу ҳақда ўтган ҳафтада истеъфога чиққан Янги Жанубий Уэльс штати полицияси аксилтеррор бўлинмаси бошлиғи Марк Мердок маълум қилди, дея хабар беради «ТАСС».
The Australian нашрига берган интервьюсида Мердок полиция томонидан июль ойида олди олинган террорчиларнинг Сидней — Абу-Даби йўналишида парвоз қилган Etihad Airways самолётини портлатишга уринишини эслатиб ўтди.
« ИШИД бу уринишни яна такрорлашга ҳаракат қилмайди деб ўйлаш соддалик бўлар эди», —деди Мердок.
Унинг айтишича, 2014—2017 йиллар оралиғида мамлакат ҳуқуқ-тартибот идоралари ўртача ҳар 6 ҳафтада бир марта теракт содир этилишининг олдини олган ёки бошқа жиддий аксилтеррор операциясини ўтказган.
«Янги терактга уриниш рўй берадиган кун яқинлашмоқда. Биз Австралияда теракт албатта содир этилишини биламиз, бироқ бунинг қаерда, қачон ва қандай кўламда рўй бериши номаълум», — таъкидлади Мердок.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)