АҚШ қуролли кучлари сержанти, 2014 йили «Толибон» асирлигидан озод қилинган Боуи Бергдал ҳибсдан қутулиб қолди. Бу ҳақда, The Washington Post газетасига асосланиб, «Интерфакс» хабар бермоқда.
У 2009–2014 йилларда «Толибон» жангарилари қўлида тутқун бўлди. АҚШ ҳарбий раҳбарияти сержантни радикал ҳаракатнинг бир қанча асир жангариларига алмаштиришга келишиб олиб, уни қутқарди. Аммо шундан кейин Бергдал дезертирлик қилганини, яъни армия сафларидан қочганини тан олди.
Дезертирлик бўйича сержантнинг ишини кўриб чиққан суд Бергдал шарманда қилиниб, қуролли кучлар сафидан чиқариб юборилишини ҳукм қилди, лекин унга қамоқ жазоси бермади.
Суд, шунингдек, Бергдални уруш фахрийларига бериладиган тиббий суғуртадан маҳрум қилиб, 10 ой ичида минг доллар жарима тўлашга ҳукм этди.
Октябрь ойида Бергдал Афғонистондаги базада навбатчилик чоғида постни тарк этганини ва шунда қўлга тушганини тан олган эди. Бу дезертирликка тенглаштирилади.
Изоҳ (0)