Нью-Йоркда 31 октябрь куни юз берган теракт ижрочиси Сайфулло Соипов чоршанба куни бўлиб ўтган дастлабки суд эшитуви вақтида гаров эвазига озод бўлишга ҳаракат қилмади. Associated Press агентлиги ахборотига кўра, Соипов қилган ишидан пушаймонлик белгиларини кўрсатмаган.
Қўлга олиниши вақтида яраланган Сайфулло Соипов судга ногиронлик аравачасида келган. Гумонланувчи ўзининг айбдорлиги ёки айбсизлиги ҳақида баёнот бермаган, шунингдек, суд жараёни бошлангунига қадар гаров эвазига озод қилишларини сўраб илтимос ҳам қилмаган.
Соиповнинг манфаатларини адвокат Дэвид Петтен ҳимоя қилмоқда. «Соипов билан мулоқотимиз қандай кечиши кўпроқ у ҳақда эмас, балки бизнинг жамият сифатидаги аҳволимиз ҳақида гувоҳлик беради», — дея адвокатнинг сўзларидан иқтибос келтирмоқда «ТАСС».
Штат Жанубий округи прокуратурасининг маълум қилишича, Сайфулло Соипов ИШИД террорчилик ташкилотини қўллаб-қувватлаш ва саккиз кишини ўлдиришда айбланмоқда. Агар унга қўйилган айб исботланса, Сайфулло Соипов ўлимга ёки умрбод қамоқ жазосига ҳукм қилиниши мумкин.
Прокуратуранинг айблов хулосасига кўра, Соипов терактга икки ой давомида тайёргарлик кўрган ва бўлажак акцияни 22 октябрь куни ижарага олинган пикап ёрдамида репетиция қилган.
Изоҳ (0)