Вадим Абрамов: Жамоалар 12 та қолар экан. Футболчилар шокда, машғулотларни йиғиштириб қўяверайликми?

ЎФФ ва ПФЛ Олий Лига клублари сонини 2018 йилнинг ўзидаёқ 12 та қолдириш ҳақида қарор чиқарди. Огоҳлантириш мавсум старти арафасида эмас, чемпионат тугашига 4 та тур қолганида бўлгани, бир қатор клубларга қаттиқ зарба бўлди.

2018 йилдан бошлаб Ўзбекистон Олий Лигасида 12 та футбол клуб қолади. Қолганлар қуйи лигага сургун бўлади

Тўғриси, эшитиб ҳайрон қолдим. Чунки бу мавсум учун регламент бор. Демак, 2019 йилдан бошлаб шу форматга ўтамиз, дейилганида бошқа гап эди. Аммо бу янгилик тўсатдан чиқди. Энди қуйи поғоналарда бораётган жамоаларда биз нима учун футбол ўйнаяпмиз, деган савол пайдо бўлади. Ҳатто футболчилар ҳам шок ҳолатида. Биз ҳам энди машғулот ўтказиш керакми ёки йўқ — ўйланиб қолдик.

Олий Лигада 12 та жамоа қолдиришни келишиб қилдик, дейишяпти. Лекин шахсан мендан ҳеч ким маслаҳат сўрагани йўқ.

Вадим Абрамов, «Нефтчи» бош мураббийи

Янги форматда ўйинлар сони кўпаяди. Ҳозир ҳар бир жамоа 30 та ўйин ўтказади, келаси йилдан 33 тадан ўйнайди. Менга қолса, жамоалар сонини кўпайтирган маъқул. Шунда ўйинлар сони ҳам ўз-ўзидан кўпаяди.

Вадим Абрамов, «Нефтчи» бош мураббийи

Карленович буёғига нима учун майдонга чиқиши кераклигини тушунмаяпти. Чунки ПФЛ ва ЎФФ ўз регламентига қарши иш қилди.

Биз мавжуд регламентга амал қилиб келаётгандик. Энди эса унинг кераги бўлмай қолди. Ҳайронман, энди нима учун майдонга тушамиз.

Вазиятга реал қараш керак. Чемпионат тугашига 4 тагина тур қолганида қандай қилиб 11-ўринни қўлга киритамиз?! ФИФА, ОФК ва УЕФА бирор ўзгаришга қўл урмоқчи бўлса, камида 2—3 йил олдин эълон қилади. Ҳамма шунга қараб, тайёргарликни бошлайди. Аммо чемпионат давом этаётган бир вақтда янги формат ҳақида эълон қилиниши тушунарсиз ҳолат.

Вадим Абрамов, «Нефтчи» бош мураббийи