Авва хабар берилганидек, 27 октябрь куни жиноий ишлар бўйича Миробод туман судида Боровский номидаги тиббиёт коллежи ўқувчиси Жасурбек Иброҳимовнинг ўлими юзасидан иш кўрилиши давом этди. Унда жабрланувчи томоннинг адвокати Лола Исмоилова расмий терговдан аҳамиятли тарзда фарқланувчи, ўзи мустақил олиб борган текширув натижаларини маълум қилди, деб ёзади «Nuz.uz». У ҳуқуқ-тартибот органлари ишида бир қатор хатоликларни аниқлади, шунингдек, ушбу жиноий иш бўйича янги фактларни ошкор этди.
Адвокат Исмоилова айблов фақат муштлашувнинг бевосита иштирокчилари кўрсатмаларига асосланганини, аммо тергов органларида далил базасини қидириш зонасини кенгайтириш учун кенг имкониятлар бўлганлигини таъкидлади. Адвокатнинг сўзларига кўра, кўп сонли гувоҳларнинг кўрсатмалари таҳлил қилинмаган, на видеокузатув камераларидаги ёзувлар, на низо иштирокчилари уяли телефонларидаги суҳбатлар ишга илова қилинган.
Сўнг Исмоилова гўёки, судланувчи Исломбекда бўлган шикастланишлар экспертизаси нотўғри ўтказилганлигини қайд этди. У шунингдек, суд эътиборини Боровский номли тиббиёт коллежидан берилган расмий ҳужжатларнинг қалбакилаштирилганига қаратди.
Адвокат Исмоилова таъкидлашича, иш материалларида коллеж ўқувчиларининг кўрсатмалари бўлиб, уларга кўра, марҳум Жасурбек Иброҳимовни камида икки киши — Тўлаганов Ислом ва Пўлатов Ўлмас дўппослаган. Адвокат, шунингдек, ҳодиса иштирокчиларининг барчаси дастлабки тергов ва суд органларини янглиштиришга уринганлигига суд диққатини қаратди.
Якунда адвокат Исмоилова мазкур ишни шахслар гуруҳи томонидан одамнинг ўлимига олиб келган оғир тан жароҳатлари берилиши деб баҳолаш кераклигини айтди. Чунки Пўлатов Ўлмаснинг хатти-ҳаракатлари Тўлаганов Исломбекнинг шериги деб баҳоланиши керак бўлган. Низонинг қолган барча кузатувчиларини адвокат камида содир этилган оғир жиноят ҳақида маълум қилмаганлик ва уни яширганлик учун жиноий жавобгарликка тортишни сўрамоқда.
Изоҳ (0)