Мажбурий ижро бюроси ташкил этилгандан буён жорий йилнинг 15 октябрига қадар Навоий вилояти Кармана туманида 74 маъмурий ҳуқуқбузарлик ҳолати аниқланди, дея хабар бермоқда ЎзА.
Натижада электр энергиясидан 24 миллион сўмдан ортиқ, табиий газдан 26 миллион сўмга яқин қарздорлик вужудга келган. Бюронинг туман бўлими томонидан бу қарздорликларни бартараф этиш чоралари кўрилиб, электр энергияси бўйича 23 миллион 280 минг сўм, табиий газ қарздорлиги бўйича 17 миллион 630 минг сўмдан ортиқ маблағ ундирилди.
Олиб борилаётган кенг кўламли тарғибот ишларига қарамасдан, айрим истеъмолчилар томонидан электр энергияси ва табиий газ истеъмоли борасида ҳамон ҳуқуқбузарликларга йўл қўйилмоқда.
Мажбурий ижро бюросининг туман бўлими ходимлари томонидан ҳудуддаги Пахтаобод маҳалласида яшовчи Р.Давронова ҳовлисидаги тандирга ўзбошимчалик билан газ тортиб, ноқонуний фойдаланиб келгани аниқланган.
Мазкур фуқаро 4 320 метр куб табиий газни ўлчов ускунасисиз сарфлагани, давлатга қарийб 1,3 миллион сўм моддий зарар етказгани маълум бўлди. Етказилган зарар тўлиқ ундирилиб, қўшимча равишда хонадон эгасига 748 минг сўм жарима жазоси қўлланилди.
Туманнинг «Малик» массивида жойлашган «Навоий чорва парранда» хусусий корхонасида электр энергиясидан ноқонуний фойдаланилаётгани аниқланди. Давлатга етказилган 1,4 миллион сўм зарар ундирилди ва корхона раҳбари I.Мусаевга нисбатан жарима жазоси қўлланилди.
Изоҳ (0)