Кўпчилик учун АҚШга йўл очган лотерея атрофида бир қатор ёлғон тасаввурлар мавжуд. Ёлғон маълумотлар туфайли кишилар ғолиб бўлиш имкониятини қўлдан бой беради. «Голос Америки» нашри Америка визасини қўлга киритиш йўналишида тўғри қадам ташлашга ёрдам берувчи фактларни тўплади, деб ёзади ForumDaily.
Фото: Depositphotos
Лотерея «Яшил карта» деб номланади
«Яшил карта» (green card) лотереясида иштирок этиш учун гўёки ариза бериш мумкин бўлган турли сайтлар кишиларни тез-тез янглиштиради. Унинг ҳақиқий номланиши — Diversity Visa Lottery (DV Lottery) бўлиб, иммигрантлар учун визалар лотереяси ёки диверсификацион лотерея деб таржима қилинади. Расмий ариза бериш мумкин бўлган интернетдаги ягона жой — бу Америка ҳукумати сайти https://www.dvlottery.state.gov /.
Лотереяда «Яшил карта» ўйналади
Лотерея ғолиби сифатида АҚШ диверсификацион иммиграция визасини қўлга киритиш учун номзодга айланасиз. Зарур босқичлардан ўтганингиздан сўнг (энг муҳими — элчихонадаги суҳбатдан ўтиш) ушбу визани қўлга кирицангиз АҚШга келганингиздан кейингина доимий яшаш гувоҳномасини оласиз (айнан у одамлар орасида «яшил карта» деб аталади).
Лотереяда ғолиб бўлишингиз АҚШ визасини қўлга киритишингизни кафолатлайди
Виза олиш зарур ҳужжатларни йиғиш ва расмийлаштириш, шунингдек, Америка элчиси билан суҳбатдан ўтишни талаб қилади. Рўйхатдан ўтишда қоидалар бузилганлиги аниқланса, ариза дисквалификация қилиниши мумкин. Интервью давомида юзага келган қониқарсиз вазиятлар ҳам виза олишингизга тўсқинлик қилиши мумкин.
Бундан ташқари, визалар дастурида иммигрантлар учун ҳар йили 50 минг виза ажратилади, танлаб олинган аризалар сони эса ҳар доим кўпроқ бўлади. Биринчи танланган 50 минг номзоднинг ҳаммаси ҳам виза учун мурожаат қилмаслиги мумкинлиги тахмин қилиниб, ғолиблар «заҳира» билан танланади. Бу эса визалар аризалари танлаб олинган барча номзодларга етмаслигини англатади.
Иштирок этиш учун аризани почта орқали юбориш мумкин
Электрон тизим фойдаланувчилар рўйхатдан ўтиши учун очиқ бўлган махсус давр — октябрь бошидан ноябрь бошигача ажратилган.
Лотереяда иштирок этиш учун ҳақ тўлаш лозим
Лотереяда иштирок этиш мутлақо бепул. Харажатлар кейинроқ, бахтли чипта соҳибига айланганингиздан сўнг юзага келади. Жараённи давом эттиришга, яъни виза олиш учун ариза беришга қарор қилсангиз элчихона йиғимлари ва бошқа хизматлар учун ҳақ тўлаш керак бўлади.
Ғолиблар маълум бир мезонлар бўйича танланади
Ютуқли аризалар лотерея принципи бўйича компьютер томонидан тасодифий танланади. Бироқ визалар олтита географик ҳудуд ўртасида тақсимланади, ҳеч бир мамлакат умумий визалар сонининг 7 фоизидан ортиғига даъвогарлик қила олмайди. Бундан ташқари, лотереяда иштирок этишни истовчилар учун маълум бир талаблар ҳам мавжуд. Масалан, таълим олганликнинг минимал даражаси. Талабларга жавоб бермасангиз ариза дисквалификация қилинади.
Аризачи аллақачон АҚШда бўлса, дастурда иштирок эта олмайди
Аризачи АҚШда ҳам, бошқа мамлакатда ҳам бўлиб тургани ҳолда ариза киритиши мумкин. Туғилган жой ҳал қилувчи аҳамият касб этади. Аллақачон Қўшма Штатлар ҳудудида бўлган иштирокчилар ғолиб бўлган тақдирда жорий мақомини доимий яшаш мақомига ўзгартириши мумкин.
Иштирок этиш учун фақат битта ариза бериш мумкин, барча бир хил имкониятга эга
Бу унчалик тўғри эмас. Иммиграция қонуни ҳақиқатан ҳам ҳар бир давр мобайнида битта ариза беришга рухсат беради. Бироқ баъзи кишилар ғалаба қозонишнинг икки карра, ҳатто уч карра имкониятини қўлга киритади.
Масалан, оила қурган бўлсангиз, эр ва хотиннинг ҳар бири алоҳида ариза бериши мумкин. Ҳар бир аризада турмуш ўртоғингизнинг маълумотларини ҳам киритасиз ва қай бирингиз ғолиб бўлсангиз ҳам ҳар иккалангиз виза олиш ҳуқуқини қўлга киритасиз. Фарзандлар билан боғлиқ вазият ҳам шунга ўхшаш — улар ота-онанинг ҳар бири аризасида кўрсатилиши мумкин (зарур).
Бу масалада махсус агентликлар, фирма ёки индивидуал консултантларга мурожаат қилиб, кўпинча ўзингизга зиён қиласиз. Бунда қуйидаги хавфли жиҳатлар юзага келади:
- аризадаги хатоликлар дисквалификация қилинишингизга олиб келади;
- маълумотларингиздан келаси йилда ҳам фойдаланиш эҳтимоли. Агентлик сизнинг номингиздан кейинчалик ҳам ариза беришга қарор қилса, бироқ сиз бундан бехабар бўлсангиз, биттадан ортиқ ариза берганлик учун дисквалификация қилинишингиз мумкин. Бундан ташқари, фирма буни сизни хабардор қилмасдан амалга оширса, унинг вакиллари эскирган маълумотларни киритади, бу эса виза олиш имконини йўққа чиқаради;
- фирмалар кўпинча рўйхатдан ўтгандан кейинги тасдиқловчи рақамни сир тутади. Усиз эса ғалаба қозонганлигингизни аниқлай олмаслигингиз ёки виза олиш жараёнини бошлай олмаслигингиз мумкин. Шу тариқа, агентликлар мижозларни ўз қоидаси бўйича ўйнашга мажбур қилади (аввал муҳокама қилинмаган молиявий мукофот талаб қилиш каби).
Шахс ажрашишни режалаштираётган турмуш ўртоғи/рафиқаси ёки АҚШга бирга олиб кетишни режалаштирмаётган фарзандларини аризасида кўрсатмаслиги мумкин
Аризани тўлдириш вақтида расмий никоҳда бўлсангиз турмуш ўртоғингиз/рафиқангиз маълумотларини тақдим этишингиз лозим. Шунингдек, аризага оила қурмаган 21 ёшгача бўлган фарзандларингизни киритишингиз лозим. Бу уларнинг сиз билан бирга яшаш-яшамаслигидан қатъий назар амалга оширилиши керак.
Шахс бошқа турдаги АҚШ иммиграцион визаси учун мурожаат этган бўлса, лотереяда иштирок этиш ҳуқуқига эга бўлмайди.
Йўқ, сиз ҳали ҳам рўйхатдан ўтиш ҳуқуқига эгасиз.
Ғолиблар йил давомида бир марта аниқланади
Баъзан АҚШ элчихонаси қўшимча ўйин ўтказади.
Ютуқ ҳақидаги хабар оддий ёки электрон почта орқали келади
Ютуқ ҳақида, қолаверса, танланмаганлигингиз ҳақидаги хабар ҳам фақат бир усул — ҳукумат сайти орқали маълум қилинади. Сайтга тегишли вақтда (одатда, 1 майдан кейин, рўйхатдан ўтгандан ярим йил ўтиб) кириб, шахсий маълумотларингизни (исм, шариф, туғилган йил ва кузда аризани расмийлаштириш чоғида берилган тасдиқловчи рақам) киритинг. Давлат департаменти лотерея натижалари ҳақида сизга шахсан маълум қилмайди. Буни мустақил билиб олишингизга тўғри келади.
Лотереяда ғолиб бўлган одам АҚШда турар-жой ва иш билан таъминланади
Йўқ. Сиз ҳеч қандай моддий ёки хизмат кўрсатиш кўмагини олмайсиз. Аксинча, лотерея ғолиби бўлсангиз, виза олишдан аввал АҚШда давлат қарамоғида бўлмаслигингизнинг исботини тақдим этишингиз керак.
Изоҳ (0)