Москвадаги салон маъмурияти ўзбекистонлик марҳум сартарош ҳақида: У оғир-вазмин, раҳмдил одам эди

Кўнгли тўлмаган мижоз томонидан ўзбекистонлик сартарош ўлдирилган Янги Москвадаги сартарошхона раҳбарияти «Metronews.ru» нашрига марҳумнинг шахси ва ўша машъум кун тафсилотлари ҳақида гапириб берди.

«Улар аввалдан таниш эмасди, — деди салон маъмури Наталья. — Ҳужум қилган шахс бизнинг доимий мижозимиз эмасди, ходимларнинг ҳеч бири уни ўша кунгача кўрмаганди. Мен ўша куни шу ерда эдим. У сочини кесиб қўйгани учун 400 рубль берди, ҳеч қандай норозигарчилик йўқ эди, аммо ўша куни яна келиб, сочини қайтадан олиб қўйишни сўради. Ҳеч қанақа тажовузкорликни пайқамадим».

«У сихни қаердан олгани тушунарсиз, — дея давом этди Наталья. — Ҳаммаси кўчада юз берди, биз у ерда эмас эдик. Ҳеч нарсани эшитмадик, ҳеч ким бақир-чақир қилгани йўқ. Кейин одамлар югуриб кетди ва кимдир полиция ва тез ёрдам чақирди».

Наталья айтиб беришича, ўзбекистонлик сартарош Достон салонда бир йил ишлаган, унинг устидан ҳеч қачон шикоят келиб тушмаган.

«Яхши мутахассис эди, беадаблик қилмасди, қўполлик қилмасди, раҳмдил одам эди. Ходимлар билан ҳеч қачон зиддиятга бормаган. У оғир-вазмин йигит эди, салонимиздан бошқа жойга бормасди», — деди қиз.

Унинг сўзларига кўра, марҳумнинг таълим ҳақидаги дипломи бўлмаган.

«У мустақил ўрганиб олган мутахассис эди. Бу ерда бир ўзи яшарди. Бутун оиласи Ўзбекистонда, Фарғонада эди. Хотини, болалари йўқ эди», — деди Наталья.

Россия пойтахтининг Янги Москва қисмида ўзбекистонлик сартарошни ўлдирганликда гумон қилиб ушланган 26 ёшли Павел исмли Россия фуқароси қотиллик айбини тан олди.

Илгари хабар қилинганидек, соч турмаги баҳонасида жанжал кўтарган жиноятчи ўзбекистонлик 24 ёшли Достон Одилхоновни сих билан ўлдирган.

Қотилликда гумондор Киров туманида истиқомат қилувчи 26 ёшли Павел исмли шахс бўлиб, у муқаддам судланган.

Қотиллик акс этган видеони сартарошнинг Антон Беляков исмли мижози интернетга жойлаштирди. У 24 ёшли ўзбекистонликнинг профессионал сартарош бўлганини таъкидлаб ўтди.

Достон Одилхонов оиладаги ягона фарзанд эди. Россияда унинг қариндошлари йўқ эди. Достоннинг эски мижозлари унинг танасини юртига қайтариш учун пул тўпламоқда.