Абдулазиз Комилов ва Жавод Зариф Ўзбекистон ва Эрон ТИВлари ўртасидаги Ҳамкорлик дастурини имзолади
Теҳронга 17 октябрь куни расмий ташриф билан келган Ўзбекистон ташқи ишлар вазири Абдулазиз Комилов Эрон ташқи ишлар вазири Жавод Зариф билан учрашди. Бу ҳақда Ўзбекистон ТИВ матбуот хизмати маълум қилди.
Хабар беришларича, вазирлар икки томонлама ҳамкорликнинг долзарб жиҳатларини муҳокама қилдилар, халқаро ва минтақа сиёсати муаммолари юзасидан фикр алмашган.
Суҳбат чоғида Ислом ҳамкорлик ташкилоти саммити доирасида 11 сентябрь куни Остона шаҳрида бўлиб ўтган Ўзбекистон Президенти Шавкат Мирзиёев ва Эрон Президенти Ҳасан Руҳонийнинг учрашуви Ўзбекистон—Эрон мулоқоти фаоллашишига янги туртки берганлиги таъкидланган.
«Вазирлар томонлар учун аҳамиятга эга барча соҳаларда алоқаларни мустаҳкамлаш ва ривожлантиришга тайёрлигини тасдиқлади», — дейилади ТИВ ахборотида.
Учрашувда Ўзбекистон ва Эроннинг БМТ, Шанхай ҳамкорлик ташкилоти, Ислом ҳамкорлик ташкилоти ва бошқа халқаро тузилмалар доирасидаги ҳамкорлик истиқболлари муҳокама қилинган.
Музокаралар якунида вазирлар томонидан Ўзбекистон ва Эрон ташқи ишлар вазирликлари ўртасида 2018—2019 йилларга мўлжалланган Ҳамкорлик дастурини имзоланди.
